ސަލްމާންގެ ގެއަށް ބަޑިޖެހި މައްސަލައިގައި އިތުރު މީހަކު ހައްޔަރުކޮށްފި

ސުޕަރސްޓަރ ސަލްމާން ޚާންގެ ގެއަށް ބަޑިޖެހި މައްސަލައިގައި އިތުރު މީހަކު ހައްޔަރުކޮށްފިއެވެ. އޭނާގެ ގެލެކްސީ އެޕާޓްމަންޓް ޢިމާރާތުގައި އިވުނު ސިއްސުވާލާފަދަ ބަޑީގެ ޙަމަލާއަށްފަހު އޭނާގެ ސަލާމަތާ މެދު ގިނަ ބަޔަކު އަދިވެސް ދަނީ ކަންބޮޑުވުން ފާޅުކުރަމުންނެވެ.

މީގެ މަދު ދުވަސްކޮޅެއް ކުރިން ސަލްމާންގެ ކުރީގެ ލޯބިވެރިޔާ ސޯމީ ޢަލީ ވަނީ 1998 ވަނަ އަހަރު މުޅި މައްސަލަ ފެށި ބްލެކްބަކް ޝިކާރަކުރުމުގެ މައްސަލައިގައި ބިޝްނޯއީ ކޮމިއުނިޓީގެ ކިބައިން ޢާއްމުކޮށް މަޢާފަށް އެދި، އެމީހުންގެ މަޢާފަށް ވެސް އެދިފައެވެ. މިހާރު ބިޝްނޯއީ ކޮމިއުނިޓީން ވަނީ އޭނާގެ ވާހަކަތަކަށް ރައްދު ދީފައެވެ.

މި މައްސަލައިގެ ތުހުމަތުގައި ހައްޔަރުކޮށްފައިވާ ހަރްޕަލް ސިންގގެ އައިޑެންޓިޓީ ފެންމަތިވީ ބަޑިޖެހުމުގެ މައްސަލައާ ގުޅިގެން މި މަހުގެ ކުރީކޮޅު ފުލުހުންގެ ބެލުމުގެ ދަށަށް ގެންދިޔަ ލޯރެންސް ބިޝްނޯއީ ގޭންގުގެ އިތުރު މެންބަރެއް ކަމަށްވާ މުޙައްމަދު ރަފީޤް ޗޯދަރީއާ ސުވާލު ކުރުމުގެ މަރުޙަލާގައެވެ.

ފުލުހުން ބުނި ގޮތުގައި ހަރްޕަލް ސިންގ، ރަފީޤް ޗައުދަރީއަށް ގާތްގަނޑަކަށް ތިންލައްކަ ރުޕީސްގެ އިތުރުން ސަލްމާން ޚާންގެ ގެ ބަލާ ފާސްކުރަން އަންގާފައިވެއެވެ. އެގޮތުން އޭނާ ސަލްމާން ޚާންގެ ގެއަށް ފަސް ފަހަރަށް ވުރެ ގިނަ ފަހަރު މަޢުލޫމާތު ހޯދަން ނުވަތަ ޖާސޫސީ ޒިޔާރަތްތަކެއް ކޮށްފައިވާ ކަމަށް ބުނެއެވެ.

ސަލްމާންގެ ޢާއިލާއާއި ގާތް ރަޙްމަތްތެރިންނަށް މަހާރާޝްތުރާ ސަރުކާރުގެ އިތުރު ޙިމާޔަތެއް ދަނީ ލިބެމުންނެވެ.

ސައިކަލެއްގައި އެ ޖަރީމާ ހިންގަމުން ދިޔަ ދެމީހުން މީގެ ކުރިން ހައްޔަރުކޮށްފައިވާއިރު އެއީ ވިކީ ގުޕްތާ، 24، އާއި ސާގަރް ޕާލް، 21،އެވެ. ނަމަވެސް މި 2 މީހުންނަކީ ލޯރެންސް ބިޝްނޯއީއާ ގުޅުން ހުރި ބައެއް ކަމަށް އަދި ކަށަވަރެއް ނުވެއެވެ.