މުރައިދޫގޭގެ މުވައްޒަފުންގެ މަޢުލޫމާތު ހާމަކުރަން 241 ކޮމެޓީން ނިންމައިފި

މަޖިލީހުގެ ސަލާމަތީ ޚިދުމަތްތަކާ ބެހޭ 241 ކޮމެޓީން މިއަދު ހަވީރު ބޭއްވި ޚާއްޞަ ބައްދަލުވުމެއްގައި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ދިރިއުޅުއްވާ މުރައިދޫގޭގައި އުޅޭ މުވައްޒަފުންގެ އަދަދާއި އެ މީހުންގެ މުސާރަ ހާމަކުރަން ފާސްކޮށްފިއެވެ.

މި ނިންމުމަކީ ކުރިން އެ ކޮމެޓީން ނިންމާފައިވާ ނިންމުމެއް ބަދަލުކޮށް، އަލުން ވޯޓަށް އަހައިގެން ނިންމި ނިންމުމެކެވެ. މި ބައްދަލުވުން ބޭއްވުނީ މުރައިދޫގޭގެ މުވައްޒަފުންގެ މަޢުލޫމާތު ހާމަނުކުރަން ކުރިން ނިންމި ނިންމުން ބަދަލުކުރުމަށް ރައީސް މުހައްމަދު މުއިއްޒު އެންގެވުމާ ގުޅިގެންނެވެ.

އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހް ހުށަހެޅުއްވި ގޮތަށް، މުރައިދޫގޭގައި މަސައްކަތްކުރާ މުވައްޒަފުންގެ ވަނަވަރާއި އަދަދު، އަދި އެކަމަށް ހޭދަވާ މިންވަރު ހާމަކުރުމަށް ކޮމެޓީގައި ބައިވެރިވި މެންބަރުންގެ ތެރެއިން އެއް މެންބަރަކު ފިޔަވައި އެހެން ހުރިހާ މެންބަރުން ވޯޓު ދެއްވިއެވެ. މި ހުށަހެޅުމާ ދެކޮޅަށް ވޯޓު ދެއްވި ހަމައެކަނި މެންބަރަކީ ހަނިމާދޫ ދާއިރާގެ މެންބަރު އަބްދުލް ގަފޫރު މޫސާއެވެ.

ގަފޫރު ވިދާޅުވީ މައްސަލައަށް ނިންމުމެއް ނިންމާފައިވަނިކޮށް އަލުން އެ މައްސަލަ ތާވަލްކޮށްގެން ނިންމުން ބަދަލު ނުކުރެވޭނެ ކަމަށެވެ. ނަމަވެސް ކޮމެޓީގެ މުގައްރިރު، އޭދަފުށީ ދާއިރާގެ ޕީއެންސީ މެންބަރު އަހްމަދު ސަލީމް ވިދާޅުވީ އެ ގޮތަށް ނިންމުން ނިންމޭނެ ކަމަށެވެ.

މަޖިލީހުގެ ރައީސް އަބްދުއްރަހީމް މުރައިދޫގެއަށް ބަދަލުވެވަޑައިގެންނެވީ އެ ގެ މަރާމާތުކުރުމަށްފަހު 25 ޖުލައިގައެވެ. މުރައިދޫގޭގެ ވެރިޔާ ނުވަތަ ޗީފް އޮފް ސްޓާފަކަށް ނޫސްވެރިޔާ އާދަމް ހަލީމް (މުންޑޫ އާދަމް ހަލީމް) ވެސް މިދިޔަ ޖުލައި މަހުގެ ފަހުކޮޅު ހަމަޖައްސާފައިވެއެވެ. އަދި އެ ގޭގެ އިސް މަޤާމަކަށް ރާއްޖޭގެ އެންމެ މޮޅު ފުޓްބޯޅަ ޝަޚްޞިއްޔަތު އަލީ އަޝްފާގު ވެސް ވަނީ މިދިޔަ މަހު އައްޔަންކޮށްފައެވެ.

މަޖިލީހުގެ ރައީސް ހުންނަވަން ޚާއްޞަ ގެއެއް ދައުލަތުން ކަނޑައަނޑައަޅާ ގޮތަށް ހަމަޖެއްސީ ކުރީގެ ރައީސް މުހައްމަދު ނަޝީދަށް 9 މޭ 2021ގައި ދިން ބޮމުގެ ހަމަލާއަށް ފަހުއެވެ.