ރާއްޖޭގެ ޑިވެލޮޕްމަންޓް ބޭންކަށް ލައިސަންސް ދޫކޮށްފި

ލައިސަންސް ދޫކުރުމުގެ ތެރެއިން / ފޮޓޯ:އެމްއެމްއޭ

މޯލްޑިވްސް ޑިވެލޮޕްމަންޓް ބޭންކަށް ބޭނުންވާ ލައިސަންސް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ދޫކޮށްފިއެވެ.

އެމްއެމްއޭގައި ބޭއްވުނު ރަސްމިއްޔާތެއްގައި މި ލައިސަންސް އިކޮނޮމިކް މިނިސްޓަރު މުހައްމަދު ސައީދާ ހަވާލުކޮށްދެއްވީ އެމްއެމްއޭގެ ގަވަރުނަރު އަހުމަދު މުނައްވަރެވެ.

ރައީސް ޑރ. މުއިއްޒުގެ ރިޔާސީ ވައުދުފުޅާ އެއްގޮތަށް މިއަހަރުގެ މެއި އި 16 ގައި އުފެއްދި މި ބޭންކުގެ އިސް މަޤާމުތަކަށް ބައިނަލްއަޤްވާމީ ތަޖުރިބާކާރުން އައްޔަންކޮށްފައިވެއެވެ. ޗެއާޕާސަންގެ މަޤާމަށް އަރޫނީ ގޫނަތިލަކަ އަދި ސީއީއޯގެ މަޤާމަށް ނޮއެލް ގްރެގާ ޕެޓާސަން-ޖޯންސް ހަމަޖައްސާފައިވެއެވެ.

މި ބޭންކުގެ މައިގަނޑު އަމާޒަކީ ރާއްޖޭގެ ފަތުރުވެރިކަމުގެ ދާއިރާ، ހަކަތައިގެ ދާއިރާ އަދި ބިނާވެށީގެ ދާއިރާގެ އިތުރުން އެހެނިހެން ތަރައްޤީގެ ދާއިރާތަކަށް އިންވެސްޓްމަންޓް ގެނައުމެވެ. މީގެ އިތުރުން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޕީއެސްއައިޕީ މަޝްރޫޢުތަކަށް ފައިނޭންސިންގ ހޯދުމުގެ ގޮންޖެހުންތައް ހައްލުކުރުމަކީވެސް މި ބޭންކުގެ މުހިންމު މަޤްޞަދުތަކެވެ.

ސަރުކާރުގެ އަމާޒަކީ މިއަހަރުގެ ތެރޭގައި މި ބޭންކު ހުޅުވައި ޚިދުމަތް ދޭން ފެށުމެވެ. މި ބޭންކު ޤާއިމުވުމުން ރާއްޖޭގެ އިޤްތިޞާދަށް ބޮޑު ކުރިއެރުމެއް ލިބި، ބޭރު ފައިސާ ރާއްޖޭގައި ބެހެއްޓުމުގެ ޝައުޤުވެރިކަން އިތުރުވެގެންދާނެ ކަމަށް ބެލެވެއެވެ.

އެމްއެމްއޭ