އިސްރާއީލުގެ ހަމަލާތަކުގައި ޣައްޒާގެ އުތުރުގައި 29 މީހުން ޝަހީދުވެއްޖެ

އިސްރާއީލުން ޣައްޒާގެ އުތުރަށް ދިން އަސްކަރީ ވައިގެ ހަމަލާތަކުގައި ގާތްގަނޑަކަށް 29 މީހުން ޝަހީދުވެއްޖެއެވެ.

ހޮނިހިރު ދުވަހު ވައިގެ މަގުންނާއި އެއްގަމު މަގުން ދިން މި ހަމަލާތަކުގައި އިސްރާއީލު ސިފައިން ވަނީ ޣައްޒާގެ އެންމެ ބޮޑު ރެފިއުޖީ ކޭމްޕް ކަމަށްވާ ޖަބަލިއާގެ އުތުރަށް ވަދެފައެވެ.

އިސްރާއީލުން ޖަބާލިއާގެ ދެ ގެއަކާއި މެދުތެރޭ ޣައްޒާގެ ނޫސެއިރާތު ކޭމްޕަށް ހަމަލާދީ 19 މީހުން ޝަހީދުކޮށްލާފައިވާއިރު، ހޮނިހިރު ދުވަހުގެ ހަވީރު އިތުރު 10 މީހަކު ޝަހީދުކޮށްލާފައިވާ ކަމަށް ޣައްޒާގައި ހަރަކާތްތެރިވާ ޑޮކްޓަރުންގެ ޓީމަކުން ވަނީ ހާމަކޮށްފައެވެ. މި ހަމަލާތަކުގައި ޒަޚަމްވެފައިވާ މީހުންގެ ހާލު ސީރިއަސްކަމުން މަރުވާ މީހުންގެ އަދަދު އިތުރުވާނެ ކަމަށްވެސް އެ ޓީމުން ބުނެއެވެ.

ޣައްޒާއަށް އިންސާނީ އެހީ ފޯރުކޮށްދިނުމަށް މަސައްކަތް ކުރާ ފަރާތްތަކުން ބުނާ ގޮތުގައި މި ސަރަހައްދުގައި އެތައް ހާސް ބަޔަކު ތާށިވެފައި ތިބިއިރު، އިސްރާއީލުގެ އަސްކަރިއްޔާއިން ވަނީ އިތުރު ދެ ސަރަހައްދަކުން މީހުން ހުސްކުރުމަށްވެސް އަމުރުކޮށްފައެވެ. ނަމަވެސް ޣައްޒާގެ ހަމާސް ޖަމާއަތުން ހިންގާ އިންޓީރިއާ މިނިސްޓްރީން ނެރުނު ބަޔާނެއްގައި ވަނީ އުތުރުގެ ސަރަހައްދުތަކަށް ބަދަލު ނުވުމަށާއި އަދި ދެކުނަށް ނުދިއުމަށް ވެސް އިލްތިމާސްކޮށްފައެވެ.

ފަލަސްތީނުގެ ސިއްހީ އޮފިޝަލުން ބުނާ ގޮތުގައި ފާއިތުވި ހަފްތާގެ ތެރޭގައި ޖަބަލިއާގައި ޝަހީދުވި މީހުންގެ އަދަދު ގާތްގަނޑަކަށް 150 އަށް އަރާފައިވާއިރު، އިސްރާއީލުން ޣައްޒާއަށް ދޭ ހަމަލާތަކުގައި މިހާތަނަށް 42,000 އަށްވުރެ ގިނަ މީހުން ވަނީ ޝަހީދުކޮށްލާފައެވެ. މީގެ އިތުރުން، ލުބުނާނުގައި ވެސް އިސްރާއީލުން ވަނީ ހަމަލާތައް ދެމުން ގެންދާއިރު، އެ ހަމަލާތަކުގައި ސެޕްޓެމްބަރު މަހުން ފެށިގެން މިހާތަނަށް ލުބުނާނުގެ 1,400 އަށްވުރެ ގިނަ މީހުން ވަނީ ޝަހީދުކޮށްލާފައެވެ.