ވިފާގު މަރުވި މައްސަލާގައި ޖިންސީ ގޯނާގެ ހެކި ފެންނާކަށް ނެތް: ފުލުހުން

މާލޭގެ ނުވަ ބުރީގެ އިމާރާތަކުން މިދިޔަ އޮގަސްޓު މަހު ވެއްޓި މަރުވި ޒުވާން އަންހެނަކު ނަފުސާނީ ބައްޔަށް ފަރުވާ ކުރަމުން ދިޔަ ކަމަށާއި، ނަމަވެސް ޖިންސީ ގޯނާ ލިބިފައިވާ ކަމުގެ އެއްވެސް ހެއްކެއް މިހާތަނަށް ފާހަގަކުރެވިފައި ނުވާ ކަމަށް ފުލުހުން މިއަދު ބުނެފިއެވެ.

ހަސޯވާ ބިލްޑިންގުން ވެއްޓި މަރުވި ވިފާގް އިބްރާހިމް އަދުނާނުގެ މަރާ ގުޅޭ ގޮތުން ފުލުހުން ބޭއްވި ނޫސްވެރިންގެ ބައްދަލުވުމެއްގައި، ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ވިފާގަކީ 2016 ވަނަ އަހަރުން ފެށިގެން ނަފުސާނީ ބައްޔަށް ފަރުވާ ކުރަމުން އައި މީހެއް ކަމަށެވެ.

ޝިފާއު ވިދާޅުވީ ވިފާގަށް ޖިންސީ ގޯނާކޮށްފައިވާ ކަމަށް ދެކެވޭ ވާހަކަތަކާ ގުޅޭ ގޮތުން ތަހުގީގުން މިހާތަނަށް ހޯދި ހޯދުންތަކުން އެފަދަ އެއްވެސް ކަމެއް ފާހަގަކުރެވިފައި ނުވާ ކަމަށެވެ. އަދި އެފަދަ މައުލޫމާތެއް ވެސް ފުލުހުންނާ ހަމައަށް އެއްވެސް ފަރާތަކުން ފާހަގަކޮށްފައި ނުވާ ކަމަށް އޭނާ ވިދާޅުވިއެވެ.

ވިފާގު މަރުވިއިރު އޭނާއަކީ ބިކުރުވެރިއެއްކަން ފުލުހުންނަށް ޔަގީންކުރެވިފައިވާ ކަމަށާއި، އޭނާގެ ސިއްހީ ލިޔެކިޔުންތަކުން ވެސް ޖިންސީ ގޯނާއާ ގުޅޭ އެއްވެސް ކަމެއް ފެއް ފާހަގަވެފައި ނުވާ ކަމަށް ޝިފާއު ވިދާޅުވިއެވެ.