މަޖިލީހުގެ ރައީސް އައިޕީޔޫ އެސެމްބްލީއަށް ފުރާވަޑައިގެންފި

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ބައެއް މެންބަރުން އިންޓަ-ޕާލަމެންޓްރީ ޔޫނިއަން (އައިޕީޔޫ)ގެ އެސެމްބްލީގައި ބައިވެރިވުމަށް ރޭ ފުރާވަޑައިގެންފިއެވެ.

ސްވިޒަލެންޑުގެ ޖެނީވާގައި މި މަހުގެ 13-17 އަށް ބޭއްވޭ އައިޕީޔޫގެ 149 ވަނަ އެސެލްބްލީގައި އަބްދުއްރަހީމްގެ އިތުރުން ބައިވެރިވަނީ ހަތަރު މެންބަރުންނެވެ. އެއީ ވިލިމާލޭ ދާއިރާގެ މުހައްމަދު އިސްމާއީލް، ފުވައްމުލަކު މެދު ދާއިރާގެ އަލީ ފަޒާދު، ހުޅުދޫ ދާއިރާގެ މުހައްމަދު ޝާހިދު އަދި ކަނޑިތީމު ދާއިރާގެ އަމީން ފައިސަލްއެވެ.

މި ފަހަރުގެ އެސެމްބްލީގެ މައުލޫއަކީ ސުލުހަވެރި އަދި ދެމެހެއްޓެނިވި މުސްތަގުބަލަކަށްޓަކައި ސައިންސް، ޓެކްނޮލޮޖީ އެންޑް އިނޮވޭޝަން (އެސްޓީއައި)ގެ ބޭނުން ހިފުމެވެ. މިއީ މަޖިލީހުގެ ރައީސްގެ ހައިސިއްޔަތުން އަބްދުއްރަހީމް ރާއްޖޭން ބޭރަށް ވަޑައިގަންނަވާ ދެ ވަނަ ދަތުރެވެ.

މަޖިލީހުގެ މި އަހަރުގެ ތިން ވަނަ ދައުރުގެ ޖަލްސާތައް މާދަމާ ފެށުމަށް ވަނީ ނިންމައިފައެވެ.

މަޖިލިސް ރައްޔިތުންގެ މަޖިލިސް