ކުންފުނީގެ ގާނޫނުގެ ދަށުން ހަދަންޖެހޭ މުހިންމު ދެ ގަވާއިދު ގެޒެޓުކޮށްފި

ޖެނުއަރީ 1، 2024 ގައި އަމަލުކުރަން ފެށި ކުންފުނީގެ ގާނޫނުގެ ދަށުން ހަދަންޖެހޭ ދެ މުހިންމު ގަވާއިދެއް ބުރާސްފަތި ދުވަހު ގެޒެޓުކޮށްފިއެވެ.

މި ދެ ގަވާއިދަކީ ޕްރައިވެޓް ކުންފުނީގެ ގަވާއިދާއި ބޭރުގެ ކުންފުނި ރަޖިސްޓްރީ ކުރުމާ ގުޅޭ ގަވާއިދެވެ.

ޕްރައިވެޓް ކުންފުނީގެ ގަވާއިދުގައި ކުންފުނި އުފެއްދުމާއި، ރަޖިސްޓްރީ ކުރުމާއި، ހިންގުމާއި އުވާލުމާ ގުޅޭ އުސޫލުތަކާއި އިޖުރާއަތުތައް ހިމެނެއެވެ. މީގެ އިތުރުން، ކުންފުނީގެ ދުސްތޫރު، ސިއްކަ، ނަން، އެޑްރެސް، މެންބަރުންގެ ޖަލްސާތައް، ޑިރެކްޓަރުންނާ ގުޅޭ ކަންކަމާއި، ހިއްސާއާ ގުޅޭ މައްސަލަތަކުގެ ތަފްސީލު ވެސް މި ގަވާއިދުގައި ބަޔާންކޮށްފައިވެއެވެ.

ބޭރު ކުންފުނި ރަޖިސްޓްރީ ކުރުމާ ބެހޭ ގަވާއިދުގައި، ބޭރު ކުންފުނިތައް ރާއްޖޭގައި ރަޖިސްޓްރީކޮށް ހަރަކާތްތެރިވުމާއި، ރީ-ރަޖިސްޓްރީ ބާތިލުކުރުމާ ގުޅޭ އުސޫލުތައް ހިމަނާފައިވެއެވެ.

މި ގަވާއިދުތައް އެކުލަވާލުން ލަސްވުމާ ގުޅިގެން ބައެއް ގާނޫނީ ވަކީލުން ކަންބޮޑުވުން ފާޅުކޮށްފައިވީ ނަމަވެސް، މިހާރު މި ދެ ގަވާއިދު ވަނީ ގެޒެޓުކޮށް އާންމުކޮށްފައެވެ.