އެމްޑީޕީގެ އުތުރުގެ ކައުންސިލަރުންގެ ބައްދަލުވުން ކުޅުދުއްފުށީގައި

އިދިކޮޅު އެމްޑީޕީގެ ކައުންސިލަރުންނާއި ޕާޓީގެ އިސް ލީޑަރުން ބައިވެރިވާ ކޮންފެރެންސެއް މިއަދު ހދ. ކުޅުދުއްފުށީ ސިޓީގައި ފަށައިފިއެވެ.

މި ބައްދަލުވުމުގައި އެމްޑީޕީގެ ރައީސް އަބްދުﷲ ޝާހިދު، ކުރީގެ ރައީސް އިބްރާހީމް މުހައްމަދު ސޯލިހު، އަދި ޕާޓީގެ ޗެއާޕާސަން ފައްޔާޒު އިސްމާއީލް ބައިވެރިވެވަޑައިގަންނަވައެވެ.

ހއ.، ހދ.، އަދި ށ. އަތޮޅުގެ އެމްޑީޕީގެ ކައުންސިލަރުން ބައިވެރިވާ މި ބައްދަލުވުމުގައި، ޕާޓީގެ "ރޯޑު މެޕް" އަދި ލާމަރުކަޒީ ނިޒާމަށް ސަރުކާރުން ގެންނަ ބަދަލުތަކާ ގުޅޭ ގޮތުން މަޝްވަރާކުރެވޭނެއެވެ. ކޮންފެރެންސް ކުރިއަށްދާނީ މިއަދު ހެނދުނު 9 އިން ހަވީރު 4 އަށެވެ.

އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވި ގޮތުގައި މި ބައްދަލުވުމުގައި އެމްޑީޕީގެ ސަރުކާރުން ލާމަރުކަޒީ ނިޒާމަށް ގެނެސްފައިވާ ބަދަލުތަކާއި، މިހާރުގެ ސަރުކާރުން ގެންނަން އުޅޭ ބަދަލުތަކާ ގުޅޭގޮތުން މަޝްވަރާކުރެވޭނެއެވެ. މީގެ އިތުރުން، ހެނދުނު 11 އިން ފެށިގެން ހުރި ސެޝަންތައް އެމްޑީޕީގެ ސޯޝަލް މީޑިއާ ހޭންޑަލްތަކުން ލައިވްކޮށް ދައްކަމުންދާނެ ކަމަށް އެ ޕާޓީން ބުނެފައިވެއެވެ.