ޖޯކާގެ ދެވަނަ ބައި ބޮކްސް އޮފީހުގައި ބޮޑު ފްލޮޕަކަށް

ވާކީން ފީނިކްސް ލީޑް ރޯލު ކުޅުނު ސައިކޮލޮޖިކަލް ތުރިލާ "ޖޯކާ"ގެ ސީކުއެލް ކަމަށްވާ "ޖޯކާ ފޮލި އަ ޑޫ" ބޮކްސް އޮފީހުގައި ބޮޑު ފްލޮޕަކަށް ވެއްޖެ އެވެ.

ފުރަތަމަ ފިލްމަށް ލިބުނު ތަރުހީބާއި ވާކީންއަށް އޮސްކާ އެވޯޑް ލިބުމާ އެކު ގިނަ ބަޔަކު އުއްމީދުކޮށްގެން ތިބީ މި ފިލްމު ވަރަށް ހިޓުވާނެ ކަމަށެވެ. އެކަމަކު، މި ފިލްމު މިހާރު ވެފައި ވަނީ ކޮމިކް-ބުކް ފިލްމުތަކުގެ ތެރެއިން މިހާތަނަށް އެންމެ ދަށް އާމްދަނީއެއް ލިބުނު ފިލްމަށެވެ.

"ޖޯކާ ފޮލި އަ ޑޫ" އަކީ 200 މިލިއަން ޑޮލަރުގެ ބަޖެޓަކުން ހެދި މިއުޒިކަލް ފިލްމެކެވެ. މި މަހު ހަތަރެއްގައި ޕްރިމިއާކުރި މި ފިލްމަށް އިންޓަނޭޝަނަލް ބޮކްސް އޮފީހުގައި މިހާތަނަށް ލިބުނީ އެންމެ 120 މިލިއަން ޑޮލަރުގެ އާމްދަނީއެކެވެ. ފުރަތަމަ ތިން ދުވަހު ލިބުނީ 37.8 މިލިއަން ޑޮލަރެވެ. މިއީ ފުރަތަމަ ފިލްމާ އަޅާބަލާއިރު ވަރަށް ދަށް އަދަދެކެވެ.

މި ފިލްމުގައި ޖޯކާގެ ލޯބިވެރިޔާ ނުވަތަ ހާލީ ކުއިންގެ ރޯލު ކުޅުނީ ލޭޑީ ގާގާ އެވެ. އަދި އެހެން މުހިންމު ރޯލުތައް ކުޅުނީ ބްރެންޑަން ގްލީސަން، ކެތަރިން ކީނާ، ޖެކޮބް ލޮފްލެންޑް އަދި ހެރީ ލޯޓޭ އެވެ.