ބިގް ބޮސް އޯޓީޓީ 3ގެ ހޯސްޓަކަށް ކަރަން؟

"ބިގް ބޮސް އޯޓީޓީ 3"އިން ސަލްމާން ޚާން ނުފެނިދާނެ ކަމުގެ އަޑުތައް ސޯޝަލް މީޑިއާގައި ދަނީ ފެތުރެމުންނެވެ.

ގިނަ ބަޔަކު އިންތިޒާރު ކުރަމުން އަންނަ ސީޒަންގެ ހޯސްޓެއްގެ ގޮތުގައި ލީޑު ނަގާނީ ކާކުތޯ ސަޕޯޓަރުން ދަނީ ސުވާލު އުފައްދަމުންނެވެ. އެއް ނަމަކީ ފޭނުންގެ މެދުގައި މަގުބޫލު ޗޮއިސްއެއް ކަމަށްވާ ކަރަން ޖޯހަރެވެ. ނަމަވެސް އޭނާގެ ބިޒީ ޝެޑިއުލްގެ ތެރޭގައި އޭނާ ޝޯވ ހޯސްޓް ކުރާނެ ހެއްޔެވެ؟

މި ވާހަކަ ދަނީ އެކި ގޮތަށް ސޯޝަލް މީޑިއާގައި ދެކެވެމުންނެވެ. އެގޮތުން މި ޝޯވ ކެންސަލް ކުރި ކަމަށް ވެސް ބައެއް ރިޕޯޓުތަކުން ދަނީ ބުނަމުންނެވެ. އެހެންނަމަވެސް "ބިގް ބޮސް އޯޓީޓީ 3" ރަނގަޅަށް ކުރިއަށް އެބަ ދެއެވެ. މިހާރު ޝޯވގެ ޕްރޮޑަކްޝަން ކުރިއަށްދާއިރު، ޝޯވ އުފައްދާ ފަރާތްތަކުން ދަނީ ހޯސްޓެއް ހޯދުމުގެ މަސައްކަތް ކުރަމުންނެވެ.

ބިގް ބޮސް އޯޓީޓީގެ އިންތިޒާރު ކުރަމުން އަންނަ ތިންވަނަ ސީޒަންގައި އަސްލު ހޯސްޓް ސަލްމާން ޚާން މިފަހަރު ޝޯވ ހޯސްޓް ނުކުރާނެ ކަމަށް ވާހަކަ ދެކެވެމުންދާއިރު ޝޯވގެ ހޯސްޓުންގެ ގޮތުގައި މަސައްކަތް ކުރުމަށް ޕްރޮޑިއުސަރުން ދަނީ ބޮލީވުޑްގެ މަޝްހޫރު އެހެން ތަރިންނާ ވެސް ވާހަކަ ދައްކަމުންނެވެ.

އިންޑިއާގެ ނޫހެއް ކަމަށްވާ ޕިންކްވިލާއިން މަޢުލޫމާތު ލިބިފައިވާ ގޮތުގައި، ސަލްމާންގެ ބިޒީ ޝެޑިއުލްގެ ސަބަބުން ޝޯވ ހޯސްޓް ނުކުރެވިދާނެ ކަމަށް ބެލެވޭތީ، މިފަހަރުގެ ޝޯވ ހޯސްޓް ކުރުމަށް ސަންޖޭ ދަތު، އަނިލް ކަޕޫރު، އަދި ކަރަން ޖޯހަރާ މިހާރު ދަނީ ވާހަކަ ދެކެވެމުންނެވެ.

ޖޯހަރަކީ ބިގް ބޮސް ނުވަތަ ބިގް ބޮސް އޯޓީޓީގެ ކޮންސެޕްޓަށް އާ މީހެއް ނޫނެވެ. ފުރަތަމަ ބިގް ބޮސް އޯޓީޓީ ހޯސްޓް ކުރި ކަރަން ޖޯހަރު ވަނީ ބިގް ބޮސް 16 އަދި 17 ގެ ދެތިން އެޕިސޯޑެއް ވެސް ގެސްޓް ހޯސްޓްކޮށްފައެވެ.

ބިގް ބޮސް އޯޓީޓީ ސީޒަން 1 ދައްކާފައިވަނީ "ވޫޓް" މެދުވެރިކޮށެވެ. ކަރަން ޖޯހަރު ހޯސްޓް ކުރި އެ ޝޯވ ކާމިޔާބު ކުރި ބައިވެރިއަކީ ދިވްޔާ އަގަރްވާލްއެވެ. ޖިއޯ ސިނަމާއިން އެކްސްކްލޫސިވްކޮށް ދައްކާފައިވާ ބިގް ބޮސް އޯޓީޓީ ސީޒަން 2 ހޯސްޓް ކުރީ ސަލްމާން ޚާނެވެ. އެއްވަނަ ހޯދީ ޔޫޓިއުބަރެއް ކަމަށްވާ އެލްވިޝް ޔާދާވްއެވެ.

ބިގް ބޮސް އޯޓީޓީ 3 އާ ބެހޭ ގޮތުން ރަސްމީކޮށް އެއްވެސް އިއުލާނެއް ނުކުރި ނަމަވެސް، ސަޕޯޓަރުން ތިބީ ކެތް މަދުވެފައެވެ.