ކުޑަކުއްޖަކު ލައްވާ ހައިވޭގައި ސައިކަލު ދުއްވުވި މައްސަލަ ތަޙުޤީގު ކުރަނީ

ސިނަމާލެ ބްރިޖާ ގުޅޭ ހައިވޭގައި ކުޑަކުއްޖެއްގެ އަތަށް ހުންގާނު ދީގެން ސައިކަލު ދުއްވި މައްސަލައެއް ފުލުހުން ތަޙުޤީޤުކުރަން ފަށައިފައެވެ.

މި މައްސަލަ ބެލުމަށް ފުލުހުން ނިންމީ ސޯޝަލް މީޑިއާގައި ފެތުރުނު ވީޑިއޯއަކާ ގުޅިގެންނެވެ.

އާންމުވި ވީޑިއޯގައި ފެންނަނީ ޕްރީ ސްކޫލް ޔުނިފޯމުގައި ހުރި ކުޑަ ފިރިހެން ކުއްޖެއްގެ އަތަށް ބޮޑު މީހަކު ސައިކަލުގެ ހުންގާނު ދީގެން ދުއްވާ މަންޒަރެވެ. ކުޑަކުއްޖާ ހުންގާނުގައި ހިފަހައްޓާލައިގެން އިންއިރު، ފިރިހެން މީހާ އިނީ ސައިކަލުގެ ކޮންޓްރޯލް ކުޑަކުއްޖާއަށް ދީގެން، އެއް އަތް ވެސް ދޫކޮށްލައިގެންނެވެ. ނަމަވެސް އަނެއް އަތުން ހުންގާނުގައި ފިރިހެން މީހާ ހިފަހައްޓައިގެން އިންތަން ފެނެއެވެ.

ފުލުހުންގެ އިދާރާއިން ބުނެފައިވަނީ މި މަންޒަރު ސޯޝަލް މީޑިއާއިން ފެނުމާ ގުޅިގެން މައްސަލަ މިހާރު ތަޙުޤީޤުކުރަމުން ގެންދާ ކަމަށެވެ.

މިފަދަ މައްސަލައެއް މީގެ ކުރިންވެސް ވަނީ ރިޕޯޓުކުރެވިފައެވެ. އޭރު އާންމުވި ވީޑިއޯއެއްގައި ފެނުނީ ހުޅުލެ އާއި ހުޅުމާލެ ގުޅާލާ ހައިވޭގައި ކުޑަކުއްޖެއްގެ އަތަށް ސައިކަލުގެ ހުންގާނު ދޫކޮށްލައިގެން، ބޮޑު މީހަކު ފަހަތުގައި އިން މަންޒަރެވެ.

މި ބާވަތުގެ ޢަމަލުތަކަކީ ކުޑަކުދިންގެ ރައްކާތެރިކަމަށް ނުރައްކާވެ، މަގުމަތީގެ ސަލާމަތަށް ބޮޑެތި ނުރައްކާތަކެއް ކުރިމަތިކުރުވާ ކަންކަން ކަމަށް ފުލުހުން ވަނީ ފާހަގަކޮށްފައެވެ. އަދި މިފަދަ ޢަމަލުތަކާމެދު ޤާނޫނީ ފިޔަވަޅު އެޅޭނެ ކަމަށްވެސް އިންޒާރު ދީފައިވެއެވެ.