މޫސުން ގޯސްވުމާ ގުޅިގެން މެޓް އޮފީހުން ސަމާލުކަން ނެރެފި

މިދުވަސްވަރު މުޅި ރާއްޖެއަށް މޫސުން ގޯސް

މޫސުން ގޯސްވުމާ ގުޅިގެން މޫސުމާ ބެހޭ ގައުމީ އިދާރާ މެޓް އޮފީހުން ރާއްޖޭގެ ބޮޑު ސަރަހައްދަކަށް ހުދު ސަމާލު އަދި ބައެއް ސަރަހައްދުތަކަށް ރީނދޫ ސަމާލު ނެރެފިއެވެ.

ހއ އަތޮޅުން ފެށިގެން ލ އަތޮޅަށް މިއަދުގެ 8:00 އިން 13:00 އަށް ހުދު ސަމާލު ނެރެފައިވެއެވެ. އަދި ރ އަތޮޅުން ފެށިގެން ވ އަތޮޅަށް މިއަދު 11:00 އިން 15:00 އަށް ރީނދޫ ސަމާލު ނެރެފައިވެއެވެ.

މެޓް އޮފީހުން ބުނެފައިވަނީ އެ ސަރަހައްދުތަކަށް ބޯކޮށް ވާރޭވެހި ގުގުރާނެ ކަމަށް ލަފާކުރެވޭ ކަމަށެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށް ވެސް ލަފާކޮށްފައިވެއެވެ.

ކުރިއަށް އޮތް 24 ގަޑިއިރު ރާއްޖޭގެ އެކި ހިސާބުތަކަށް ވިއްސާރަވެ ގުގުރާނެ ކަމަށާއި ބައެއް ހިސާބުތަކަށް ގަދަވަޔާއެކު ބޯކޮށް ވާރޭވެހުން އެކަށީގެންވާ ކަމަށް މެޓް އޮފީހުން ބުނެފައިވެއެވެ.

ކަނޑުތައް އާންމު ގޮތެއްގައި ގަދަވާނެ ކަމަށާއި އުތުރާއި މެދުރާއްޖެތެރޭގެ ކަނޑުތަކުގެ ރާޅުތަކުގައި 5-8 ފޫޓުގެ އުސްމިން ހުންނާނެ ކަމަށް ލަފާކޮށްފައިވެއެވެ.

މޫސުން ގޯސްވެފައިވާތީ ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވެއެވެ. ވަކިން ޚާއްސަކޮށް ކަނޑު ދަތުރުކުރާ ފަރާތްތަކުން މޫސުމަށް ވަރަށް ބޮޑަށް ސަމާލުވުމަށް އެދިފައިވެއެވެ.

މޫސުން