އަންނަ ހޯމަ ދުވަހާއި ހަމައަށް ވައި މަޑުނުވެ ރާއްޖޭގެ މޫސުން ގޯސްވާނެ: މެޓް އޮފީސް

އަންނަ ހޯމަ ދުވަހާއި ހަމައަށް ވައި މަޑުނުވެ ރާއްޖޭގެ މޫސުން ގޯސްވާނެކަމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން މިއަދު ބުނެފިއެވެ.

ހުޅަނގު މޫސުމުގެ ބާރުގަދަވުމާ ގުޅިގެން، ރާއްޖެއާ ދުރުން އުތުރާއި ދެކުނުގައި ދެކޮޅިގަނޑު އުފެދިފައިވާ ކަމަށް މެޓް އޮފީހުން މިއަދު ނެރުނު ބަޔާނުގައި ފާހަގަކޮށްފައިވެއެވެ. މިކަމުގެ ސަބަބުން މިދިޔަ ހަތަރު ދުވަހު އުތުރާއި މެދުތެރޭގެ ސަރަހައްދަށް އާންމުކޮށް ވައި ގަދަވެފައިވާއިރު، ވިލާގަނޑުގައި ވެސް ވަރަށް ވައި ގަދަވެފައިވާކަން ފާހަގަކޮށްފައިވެއެވެ.

ހުޅުލެއަށް ރޭ ފަތިހު އައި ވިލާގަނޑުގައި ގަޑިއަކު 58 މޭލުގެ ބާރުމިނުގައި ވައި ޖެހިފައިވާއިރު، މިއަދު ހެނދުނު 61 މޭލަށް ވައި ބާރުވެފައިވާކަން މެޓް އޮފީހުން ހާމަކޮށްފައިވެއެވެ. މިއީ އާންމު ގޮތެއްގައި ވިލާގަނޑުގައި ވައިޖެހޭ ވަރަށް ވުރެ މާ ބާރު މިނެއްކަން ފާހަގަކޮށްފައިވެއެވެ.

މެޓް އޮފީހުގެ ލަފާކޮށްފައިވާ ގޮތުގައި، ރާއްޖޭގެ އެކި ސަރަހައްދުތަކަށް ތަފާތު މިންވަރަށް ވައި ގަދަވާނެ ކަމަށް ބަޔާންކޮށްފައިވެއެވެ. މެދުތެރޭގެ އަތޮޅުތަކަށް އެވްރެޖުކޮށް 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވޭއިރު، ދެކުނުގެ އަތޮޅުތަކަށް 10 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވެއެވެ. ވިލާގަނޑުގައި ހުރިހާ ހިސާބަކަށް ވެސް ގަޑިއަކު 45 މޭލާއި 55 މޭލަށް ވައި ބާރުވާނެ ކަމަށްވެސް ލަފާކޮށްފައިވެއެވެ.

މޫސުން ގޯސ ގޯސްވެފައިވާތީ، ކަނޑުދަތުރުފަތުރު ކުރާ ފަރާތްތަކާއި މަސްވެރިން ސަމާލުވުމަށް މެޓް އޮފީހުން އިލްތިމާސްކޮށްފައިވެއެވެ. އަދި އާންމުކޮށް އުދަ އަރާ ސަރަހައްދުތަކަށް ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން އެކަށީގެންވާ ކަމަށް ވެސް އިންޒާރު ދީފައިވެއެވެ.