އުމްރާއަށް މީހުން ގެންދިއުމަށް ލުއި ފަސޭހަ ލިބޭގޮތަށް އާ އުސޫލު ގެޒެޓްކޮށްފި

ވަރަށް ގިނަ ބަޔަކު ރާއްޖެއިން އުމުރާއަށް ދޭ

އިސްލާމީ ކަންތައްތަކާ ބެހޭ ވުޒާރާއިން މިއަދު ގެޒެޓު ކުރި އާ އުސޫލުގެ ދަށުން، އަހަރެއްގެ ކޮންމެ ހިސާބެއްގައިވެސް އުމްރާއަށް މީހުން ގެންދިއުމުގެ ހުއްދައަށް އެދި ޕްރޮޕޯސަލް ހުށަހެޅޭނެއެވެ. މި ބަދަލާއެކު ކުރިން އަމަލު ކުރަމުން އައި އުސޫލަށް އަމަލު ކުރުން ހުއްޓުނީއެވެ.

އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ، މި ބަދަލު ގެނެސްފައިވަނީ އުމްރާއަކީ އަހަރުގެ ވަކި ދުވަސްވަރެއްގައި ކުރަންޖެހޭ އަޅުކަމަކަށް ނުވާތީ އާއި އަހަރުގެ އެކި ހިސާބުތަކުގައި އުމްރާގެ ދަތުރުކުރާ މިންވަރު ކުންފުނިތަކުގައި އިތުރުވެފައިވާތީ ކަމަށެވެ.

އާ އުސޫލުގެ ދަށުން، އުމްރާއަށް މީހުން ގެންދާ ޖަމާޢަތްތަކުގެ ކަންކަން އިތުރަށް ހަރުދަނާ ކުރުމަށް، އެއްބަސްވުމާއި ހިލާފުވެއްޖެނަމަ ޖުރިމަނާ ކުރެވޭ ގޮތްތައްވެސް ކަނޑައަޅާފައި ވެއެވެ. އެގޮތުން ކަމުގެ ކުޑަބޮޑުމިނަށް ބަލައި 1،000ރ. އާއި 100،000ރ. އާ ދެމެދުގެ އަދަދަކުން ޖޫރިމަނާ ކުރެވިދާނެއެވެ.

މީގެ އިތުރުން، އުމްރާއަށް ގެންދިއުމުގެ ހުއްދަ ނެތި ނުވަތަ ހުއްދަ އާ ނުކުރަނީސް އެ ފަދަ ހިދުމަތެއް ދީފިނަމަ ޖޫރިމަނާ ކުރާނެ ކަމަށްވެސް އާ އުސޫލުގައި ބަޔާންކޮށްފައިވެއެވެ.

ވުޒާރާއިން ބުނީ، މި ބަދަލާއެކު ޕްރޮޕޯސަލް އަންނަ މިންވަރަކުން ބަލައި ހުއްދަ ދެމުން ގެންދެވުމަކީ މިކަމަށް އިދދާރީ ގޮތުން ކުރަން ޖެހޭ މަސައްކަތްތަކުގެ ދުވެލި އަވަސް ކުރުމަށްވެސް ލިބުނު އިތުރު ލުޔެއް ކަމަށެވެ.

އިސްލާމިކް މިނިސްޓްރީ