ކަޝްމީރު އިންތިޚާބުގައި ބީޖޭޕީއަށް ބާރު ގެއްލި، އެންސީއަށް ކާމިޔާބު

އިންޑިއާ ފަޅީގެ ކަޝްމީރުގައި ބޭއްވުނު އިންތިޚާބުގައި، މޯދީގެ ބީޖޭޕީއަށް ބާރު ގެއްލި، ކަޝްމީރުގެ މިނިވަންކަމަށް ތާއީދުކުރާ ނޭޝަނަލް ކޮންފަރެންސް (އެންސީ) އަށް އެންމެ ގިނަ ގޮނޑި ލިބިއްޖެއެވެ.

މި އިންތިޚާބުގައި އެންސީއަށް 42 ގޮނޑި ލިބުނު އިރު، ބީޖޭޕީއަށް ލިބިފައިވަނީ 29 ގޮނޑިއެވެ. އެންސީއާއި ކޮންގްރެސް ކޯލިޝަނަށް ޖުމްލަ 48 ގޮނޑި ލިބި، ސަރުކާރު އެކުލަވާލުމަށް ބޭނުންވާ އަޣުލަބިއްޔަތު ވަނީ ހޯދާފައެވެ.

މިއީ ފާއިތުވި 10 އަހަރު ތެރޭ ނެގުނު މިފަދަ ފުރަތަމަ ވޯޓެވެ. އަދި 2019 ގައި މޯދީ ސަރުކާރުން ކަޝްމީރުގެ ޚާއްޞަ ބާރުތައް ނިގުޅައިގަތުމަށްފަހު ބޭއްވުނު ފުރަތަމަ އިންތިޚާބެވެ.

އެންސީގެ ލީޑަރު އުމަރު އަބްދުﷲ ވިދާޅުވީ ރައްޔިތުން އުންމީދުކުރި ވަރަށްވުރެ ބޮޑަށް އެ ޕާޓީއަށް ތާއީދުކޮށްފައިވާ ކަމަށެވެ. އަދި އެ ޕާޓީގެ އަމާޒަކީ ފުލުހުންގެ ބާރުވެރިކަން ނައްތާލައި، ޖަލުތަކުން މީހުން މިނިވަންކޮށް، މީޑިއާ މިނިވަންކުރުން ކަމަށް ވިދާޅުވިއެވެ.

މި އިންތިޚާބުގެ ނަތީޖާއާއެކު، ކަޝްމީރުގައި އަމިއްލަ ސަރުކާރަކާއި ސަރަހައްދީ ޤާނޫނު ހަދާ މަޖިލީހެއް ޤާއިމުކުރުމުގެ ފުރުޞަތު ލިބިގެންދާނެއެވެ. ނަމަވެސް ކަޝްމީރަކީ "ޔޫނިއަން ޓެރިޓަރީ" އެއްގެ ގޮތުގައި ދެމިއޮންނާތީ، ނިއު ދިއްލީއިން އެސެމްބްލީއަށް ބާރު ފޯރުވުމުގެ ފުރުޞަތު އޮންނާނެއެވެ.

އެންސީގެ އެތައްސަތޭކަ އެކްޓިވިސްޓުންނެތް ވަނީ މި ކާމިޔާބީ ފާހަގަކުރުމަށް ވޯޓު ގުނާ މަރުކަޒުތަކުގެ ބޭރުގައާއި ކާމިޔާބުކުރި ކެންޑިޑޭޓުންގެ ގެތަކަށް އެއްވެ އުފާ ފާޅުކޮށްފައެވެ.