އިސްރާއީލުން ލުބުނާނަށް ދޭ ހަމަލާތައް ވަރުގަދަކުރަނީ

އިސްރާއީލުން ލުބުނާނަށް ދޭ ހަމަލާތައް އިތުރަށް ވަރުގަދަ ކުރަން ފަށައިފިއެވެ.

މިގޮތުން އެންމެ ފަހުން ވެރިރަށް ބެއިރޫތުގެ ދެކުނަށް ދިން ހަމަލާތަކުގައި މީހުން ދިރިއުޅޭ ހަތަރު އިމާރާތަކަށް މިއަދު ފަތިހުގެ ވަގުތެއްގައި ވަނީ ހަމަލާދީފައެވެ.

އިސްރާއީލުގެ އަސްކަރިއްޔާއިން ލުބުނާނަށް އިތުރު ސިފައިން ފޮނުވައި، ދެކުނުގެ އައްސޭރިފަށުގެ ސަރަހައްދުތަކާއި، ވެރިރަށް ބެއިރޫތުގެ ދެކުނު ސަބާބްސްގެ ސަރަހައްދުތަކުން މީހުން ހުސްކުރުމަށް އަމުރުކޮށްފައިވާ ކަމަށް ވެސް ވަނީ ރިޕޯޓުކުރެވިފައެވެ.

މި ހަމަލާތަކާ ގުޅިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ލުބުނާނު ވެސް ޣައްޒާ ފަދައިން ފަނާކުރެވިދާނެ ކަމަށް ބުނެ އިންޒާރުދެއްވާފައެވެ. އަންގާރަ ދުވަހު ލުބުނާނުގެ ރައްޔިތުންނަށް ފޮނުވި ވީޑިއޯ މެސެޖެއްގައި ނަތަންޔާހޫ ބުނީ ހިޒްބުﷲ އަކީ މިހާރު ވަރަށް ބޮޑަށް ބަލިކަށިވެފައިވާ ޖަމާއަތެއް ކަމަށެވެ.

ނަތަންޔާހޫ އިތުރަށް ބުނީ ހިޒްބުﷲގެ ވެރިޔާ ޙަސަން ނަޞްރުﷲއަށް ފަހު ދެން އެ ޖަމާއަތުގެ ވެރިއަކަށް އައްޔަންކުރާނެ ކަމަށް ބެލެވޭ ލީޑަރު ވެސް މަރާލާފައި ވާ ކަމަށާއި، އޭނާގެ ބަދަލުގައި ދެން އަންޔަންކުރާ ލީޑަރު ވެސް މަރާލާނެ ކަމަށެވެ.

ފަލަސްތީނުގެ ޣައްޒާއަށް އިސްރާއީލުން ހަމަލާދޭން ފެށި ފަހުން ހިޒްބުﷲއާއި އިސްރާއީލާ ދެމެދު ހިނގާ ކުރިމަތިލުންތައް ވެސް ވަނީ އިތުރުވެފައެވެ. ހިޒްބުﷲއިން ބުނާ ގޮތުގައި އެ ޖަމާއަތުން އިސްރާއީލަށް ހަމަލާ ދެނީ ޣައްޒާގައި ތިބި ފަލަސްތީނުގެ ރައްޔިތުންނަށް ތާއީދުކުރުމުގެ ގޮތުންނެވެ.

އިސްރާއީލުން ފަލަސްތީނުގެ ޣައްޒާއަށް ދެމުންގެންދާ ހަމަލާތަކުގައި މިހާތަނަށް ގާތްގަނޑަކަށް 41,965 މީހުން ޝަހީދުކޮށްލާފައިވާއިރު، ޣައްޒާގެ 2.3 މިލިއަން ރައްޔިތުންނަށް ވަނީ އެމީހުންގެ އަމިއްލަ ގެދޮރު ދޫކޮށްލަން މަޖުބޫރުވެފައެވެ.