ބައްސާމްގެ ދެ އެޕާޓްމަންޓް ފުލުހުންގެ ބެލުމުގެ ދަށަށް ގެނެސްފި

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު، އެ އެސޯސިއޭޝަންގެ ހިޔާނާތުގެ ފައިސާއިން ގަތް ކަމަށް ތުހުމަތުކުރެވޭ ދެ އެޕާޓްމަންޓް ރޭ ދަންވަރު 12 ޖެހިއިރު ފުލުހުންނާ ހަވާލުކޮށްފިއެވެ.

މި އެޕާޓްމަންޓްތަކަކީ ހުޅުމާލޭ އަމީން އެވެނިއުގެ އޭ ބްލޮކުގައި ހުރި ދެ އެޕާޓްމަންޓެވެ.

ކުރިން ފުލުހުން ބުނެފައިވަނީ ބައްސާމްގެ އެދުމުގެ މަތިން މި މަހުގެ 31 އަށް އެޕާޓްމަންޓްތައް ހަވާލުކުރުން ލަސްކޮށްފައިވާ ކަމަށެވެ. ނަމަވެސް ބަލަންޖެހޭ ކަންތައްތައް ބެލުމަށްފަހު އެޕާޓްމަންޓްތައް ހަވާލުކުރުން ލަސްކޮށްދެވެން ނެތް ކަމަށް ނިންމި ކަމަށް ފުލުހުން މިހާރު ވަނީ ހާމަކޮށްފައެވެ.

ފުލުހުން ތުހުމަތުކުރާ ގޮތުގައި މި އެޕާޓްމަންޓްތައް ގަތުމަށް ބޭނުންކޮށްފައިވަނީ ކޮވިޑް-19ގެ ދަނޑިވަޅުގައި ފުޓްބޯޅަ ކްލަބްތަކަށް އެހީތެރިވުމަށް ފީފާއިން ނަގާފައިވާ 1.9 މިލިއަން ޑޮލަރުގެ ލޯނުގެ ތެރެއިން 1 މިލިއަން ޑޮލަރެވެ. މި މައްސަލައިގައި ބައްސާމްގެ މައްޗަށް ދައުވާކޮށްދިނުމަށް މިދިޔަ މަހު ވަނީ ފޮނުވާފައެވެ.

ފުލުހުން ހާމަކޮށްފައިވާ ގޮތުގައި އަމީން ކޮންސްޓްރަކްޝަނަށް އެފްއޭއެމްގެ ފައިސާއިން 1 މިލިއަން ޑޮލަރު ދައްކާފައިވާއިރު، އެ ފައިސާއަށްވާ ދިވެހި ރުފިޔާ އަމީން ކޮންސްޓްރަކްޝަނުން އެފްއޭއެމަށް ދައްކާފައެއް ނުވެއެވެ. އަދި ފައިސާ ދެއްކި ކަމަށް ދައްކުވައިދޭ ދޮގު ލިޔެކިޔުންތައް ތައްޔާރުކޮށްފައިވާ ކަމަށްވެސް ފުލުހުން ބުނެފައިވެއެވެ.