ޓީމުގެ ފެންވަރާމެދު ހިތްހަމަޖެހޭ ކަމަށް ޗެލްސީގެ ކޯޗު މަރެސްކާ ބުނެފި

މި ސީޒަނަށް ޗެލްސީގެ ކޯޗުކަމާއި އަލަށް ހަވާލުވި މަރެސްކާގެ ކޯޗުކަމުގައި މި ވޭތުވެދިޔަ ތިން މަސްދުވަހު ކުރެވުނު މަސައްކަތާއި މެދު ހިތްހަމަޖެހޭ ކަމަށް އޭނާ ބުނެފިއެވެ.

ނޮޓިންހަމް ފޮރެސްޓާ ދެކޮޅަށް ކުޅުނު މެޗަށްފަހު މަރެސްކާ ބުނެފައި ވަނީ ލީގުގެ ހަތަރުވަނާއިގައި އޮތުމަކީ ގޯސް ހިސާބެއް ނޫން ކަމަށެވެ.

"އެންމެ ގިނަ ވެގެން 21 ޕޮއިންޓް ލިބެން އޮތީ މި ހަތް މެޗުން. އަހަރެމެން 14 ޕޮއިންޓް ހޯދައިގެން، އެއް ވަނައިގައި އޮތް ޓީމާ ހަތަރު ޕޮއިންޓުގެ ފަރަގެއް މި އޮތީ. ލީގުގެ ހަތަރެއްގައި މި އޮތީ ވެސް. މިއީ، ގޯސް ހިސާބެކޭ ޔަގީނުން ވެސް އަހަންނެއް ނުބުނާނަން،" މަރެސްކާ ބުންޏެވެ.

ނަމަވެސް މަރެސްކާ ފާހަގަކުރި ގޮތުގައި އަމިއްލަ ދަނޑުގައި ކުޅޭ މެޗުތަކުން ނަތީޖާ ނެރުމުގައި ދަތިތަކެއް ދިމާވަމުންދެއެވެ. އެހެންނަމަވެސް އެންމެ ފަހުން އަމިއްލަ ދަނޑުގައި ކުޅުނު ހަތަރު މެޗުން ތިން މެޗުގައި މޮޅުވެފައިވާތީ، އެއީ ޕޮޒިޓިވް ކަމެއްގެ ގޮތުގައި މަރެސްކާ ދެކެއެވެ.

ޗެލްސީގެ ކުރިއަށް އޮތް މެޗަކީ މަހުގެ 20 ވަނަ ދުވަހު ލިވަޕޫލާ ދެކޮޅަށް ރަށުން ބޭރުގައި ކުޅޭ މެޗެކެވެ. މި މެޗަށް ތައްޔާރުވުމުގައި ޓީމުގެ ކުޅުން އިތުރަށް ރަނގަޅުކުރުމަށް މަސައްކަތްކުރާނެ ކަމަށް މަރެސްކާ ބުނެފައި ވެއެވެ.