ޕާކިސްތާނުގެ ކަރާޗީގައި ދިން ނިރުބަވެރި ހަމަލާއެއްގައި ޗައިނާގެ ދެ ރައްޔިތުން މަރުވެއްޖެ

ކަރާޗީގައި ދެވުނު ހަމަލާގެ ތެރެއިން

ޕާކިސްތާނުގެ ކަރާޗީގައި އޮންނަ ޖިންނާ އިންޓަނޭޝަނަލް އެއާޕޯޓް ކައިރިން ބޮޑު ތެޔޮ ބައުޒަރެއް ގޮއްވާލައިގެން ދިން ނިރުބަވެރި ހަމަލާއެއްގައި ޗައިނާގެ ދެ ރައްޔިތުން މަރުވެއްޖެއެވެ. މި ހަމަލާގެ ޒިންމާ ބަލޫޗިސްތާނު ލިބަރޭޝަން އާމީ (ބީއެލްއޭ) އިން ވަނީ ނަގައިފައެވެ.

ޕާކިސްތާނުގައި ހުންނަ ޗައިނާ އެމްބަސީން މަޢުލޫމާތު ދިން ގޮތުގައި މި ހަމަލާ އަމާޒުކޮށްފައިވަނީ ޕޯޓް ޤާސިމް އިލެކްޓްރިކް ޕަވަރ ކޮމްޕެނީގެ އުޅަނދުތަކަކަށެވެ. މި ހަމަލާގައި ޗައިނާގެ އިތުރު ރައްޔިތަކު ޒަޚަމްވެފައިވާ ކަމަށް ޕާކިސްތާނުގެ ބޮޑުވަޒީރު ޝަހްބާޒް ޝަރީފްގެ އޮފީހުން ނެރުނު ބަޔާނެއްގައި ބުނެފައިވެއެވެ.

ބީއެލްއޭ އަކީ ޕާކިސްތާނުގެ ބަލޫޗިސްތާން ސޫބާގެ މިނިވަންކަމަށް މަސައްކަތްކުރާ ވަކިވެގެންވާ ހަނގުރާމަވެރި ޖަމާޢަތެކެވެ. މި ޖަމާޢަތުން އާންމުކޮށް އަމާޒުކުރަނީ ޕާކިސްތާނުގައި ހުރި ޗައިނާގެ މަޞްލަޙަތުތަކަށެވެ.ެ.

ބޮޑުވަޒީރު ޝަރީފް ވިދާޅުވީ މި ހަމަލާއާ ގުޅިގެން ތަޙުޤީޤު ކުރިޔަށްދާ ކަމަށާއި ޕާކިސްތާނުގައި ތިބޭ ޗައިނާގެ ރައްޔިތުން ރައްކާތެރިކުރުމަށް ފުރިހަމައަށް މަސައްކަތްކުރާނެ ކަމަށެވެ.

މި ހަމަލާ ދީފައިވަނީ ޕާކިސްތކިސްތާނުގެ ވެރިރަށް އިސްލާމާބާދުގައި ޝަންގްހާއީ ކޯޕަރޭޝަން އޯގަނައިޒޭޝަން (އެސްސީއޯ) ގެ ބައްދަލުވުން ބޭއްވުމަށް ތައްޔާރުވަމުންދާ ދަނޑިވަޅެއްގައެވެ. ޗައިނާއިން ޕާކިސްތާނުގައި ކުރަމުންދާ ބިލިއަން ޑޮލަރުތަކުގެ އިންވެސްޓްމަންޓްތަކަށް މިފަދަ ސަލާމަތީ މައްސަލަތަކުގެ ސަބަބުން އަސަރުކުރަމުންދާ ކަމަށް ރިޕޯޓުތަކުގައި ފާހަގަކޮށްފައިވެއެވެ.

ޗައިނާ