އަނެއްކާވެސް 52.1 މިލިއަން ރުފިޔާ ދެއްކުމަށް އެފްއޭއެމްއަށް ކޯޓުން އަމުރުކޮށްފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ދެކުނު ކޮރެއާގެ ކުންފުންޏެއް ކަމަށްވާ ޓީކުއިން ކޮންސްޓްރަކްޝަން ކޯ ލިމިޓެޑަށް 3،382،000 ޑޮލަރު (52.1 މިލިއަން ރުފިޔާ) ދެއްކުމަށް ސިވިލް ކޯޓުން ހުކުމްކޮށްފިއެވެ.

ކޯޓުގެ ހުކުމުގައިވާ ގޮތުން، މި ފައިސާއަކީ އެފްއޭއެމް އާއި ޓީކުއިން ކޮންސްޓްރަކްޝަންއާ ދެމެދު 2021 ވަނަ އަހަރުގެ މާޗު މަހުގެ 20 ވަނަ ދުވަހު ގާއިމްކުރެވުނު އެއްބަސްވުމުގެ ދަށުން ވިލިމާލެ އާއި ހުޅުމާލޭގައި ތަރައްގީކޮށްފައިވާ ފުޓްބޯޅަ ދަނޑުތަކުގެ އަގުތަކާއި ހުޅުމާލޭގައި ކުރެވިފައިވާ ރީކޮންސްޓްރަކްޝަންގެ މަސައްކަތުގެ އަގެވެ.

މި ފައިސާ މި މަހުގެ އެއްވަނަ ދުވަހުން ފެށިގެން އެއް މަސް ދުވަހުގެ ތެރޭގައި ސިވިލް ކޯޓަށް ދައްކާ ހަލާސްކުރަންވާނެ ކަމަށް ކޯޓުން އަމުރުކޮށްފައިވެއެވެ.

އެފްއޭއެމްގެ މާލީ ގިނަ މައްސަލަތަކެއް ފެންމަތިވެފައިވާއިރު، ރާއްޖޭގެ ކޯޓުތަކުން އަންނަނީ އެފްއޭއެމް އާއި ގުޅޭ ގިނަ މައްސަލަތަކެއް ބަލަމުންނެވެ. މީގެ އިތުރުން، އެފްއޭއެމްގެ މައްޗަށް މީގެ ކުރިންވެސް އެކި އެކި ކުންފުނިތަކަށް ފައިސާ ދެއްކުމަށް ވަނީ ހުކުމް ކޮށްފައެވެ.

ދުނިޔޭގެ މައި ފުޓްބޯޅަ އިދާރާ، ފީފާއިން ވަނީ މާލީ ހިޔާނާތުގެ ބޮޑަތި މައްސަލަ ގަނޑެއްގެ ތެރޭގައިވާ ރާއްޖޭގެ ފުޓްބޯޅައިގެ މައި އިދާރާ އެފްއޭއެމް ހިންގުން ނޯމަލައިޒިން ކޮމިޓީއަކާ މިދިޔަ އޮގަސްޓް މަހު ހަވާލުކޮށްފައެވެ.