ރަޝިޔާއިން ޠާލިބާނުން ނިރުބަވެރި ޖަމާޢަތްތަކުގެ ލިސްޓުން އުނިކުރަން ނިންމައިފި

އަފްޣާނިސްތާނުގައި ވެރިކަން ކުރާ ޠާލިބާނުން ނިރުބަވެރި ޖަމާޢަތްތަކުގެ ލިސްޓުން އުނިކުރަން ރަޝިޔާގެ ޚާރިޖީ ވުޒާރާއިން ނިންމައިފިއެވެ.

ރަޝިޔާގެ ހާރިޖިއްޔާ އާއި ހަވާލާދީ އެ ގައުމުގެ ދަޢުލަތުގެ މީޑިޔާއިން ހާމަކޮށްފައިވާ ގޮތުގައި މި ނިންމުން ނިންމާފައިވަނީ އެ ގައުމުގެ ސަރުކާރުގެ އެންމެ މަތީ ފަންތީގައި ފުޅާ ދާއިރާއެއްގައި ގިނަ މަޝްވަރާތަކެއް  ކުރުމަށްފަހުގައެވެ.

ޠާލިބާނުން އަފްޣާނިސްތާނުގެ ވެރިކަން ފޭރިގަތީ 2021 ވަނަ އަހަރުގެ އޮގަސްޓު މަހުއެވެ. ނަމަވެސް، މިހާތަނަށް އެއްވެސް ޤައުމަކުން ޠާލިބާނުންގެ ސަރުކާރު ރަސްމީކޮށް ބަލައިގަނެފައެއް ނުވެއެވެ. އެހެންނަމަވެސް، ޗައިނާއާއި ޔޫއޭއީން ވަނީ ޠާލިބާނުންގެ ސަފީރުން ބަލައިގަނެފައެވެ.

ރަޝިޔާއިން އަފްޣާނިސްތާނަށް ކަނޑައަޅާފައި ހުންނަވާ ޚާއްޞަ މަންދޫބު ޒައިމީރް ކަބޫލޮފް ވިދާޅުވެފައިވަނީ، ޠާލިބާނުން ލިސްޓުން އުނިކުރުމުގެ ކުރިން ފުރިހަމަ ކުރަންޖެހޭ ޤާނޫނީ އިޖުރާޢަތްތައް ފުރިހަމަ ކުރުމުގެ މަސައްކަތް ފަށާފައިވާ ކަމަށެވެ. ރަޝިޔާގެ ރައީސް ވްލަޑިމިޔަރ ޕުޓިން ވަނީ ނިރުބަވެރިކަމާ ދެކޮޅަށް ކުރަމުންދާ ހަނގުރާމައިގައި ޠާލިބާނަކީ ރަޝިޔާގެ ވާގިވެރިއެއް ކަމުގައި ވިދާޅުވެފައެވެ.

ރަޝިޔާއިން ޠާލިބާނުން ނިރުބަވެރި ޖަމާޢަތްތަކުގެ ލިސްޓުގައި ހިމަނާފައިވަނީ 2003 ވަނަ އަހަރުއެވެ. ނަމަވެސް، 2021 ވަނަ އަހަރުން ފެށިގެން ރަޝިޔާއިން ދަނީ ޠާލިބާނުންނާއެކު ގުޅުން ބަދަހި ކުރަމުންނެވެ. މިއީ ދެ ފަރާތުގެ ގުޅުން އިތުރަށް ހަރުދަނާ ކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.

ރަޝިޔާގެ ޚާރިޖީ ވަޒީރު ސެރްގިޔޭ ލެވްރޮފް ވިދާޅުވެފައިވަނީ އަފްޣާނިސްތާނުގެ ވެރިރަށް ކާބުލާ ގުޅުން ބަދަހި ކުރުމަކީ މުހިންމު ކަމެއް ކަމަށެވެ. އަދި ކާބުލާއެކު ސިޔާސީ، ވިޔަފާރި އަދި އިޤުތިޞާދީ ދާއިރާއިން ގުޅުން ބަދަހި ކުރަމުންދާނެ ކަމުގައި ވެސް އޭސް އޭނާ ވިދާޅުވިއެވެ.