ފަތުރުވެރިކަމުގެ ދާއިރާގެ ވިޔަފާރިތަކުން އެމްއެމްއޭގައި ރަޖިސްޓްރީވުމަށް ހުޅުވާލައިފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިމަހުގެ އެއްވަނަ ދުވަހު ތަންފީޒުކުރަން ފެށި ބޭރުފައިސާއާ ބެހޭ އައު ގަވާއިދުގެ ދަށުން، ފަތުރުވެރިންނަށް ޚިދުމަތްދޭ ފަރާތްތަކުން އެމްއެމްއޭގައި ރަޖިސްޓްރީވުމަށް ހުޅުވާލައިފިއެވެ.

އެމްއެމްއޭއިން ނެރުނު ނޫސްބަޔާނެއްގައި ބުނެފައިވަނީ، ޓޫރިޒަމް ދާއިރާގައި މުދާ ވިއްކާ އަދި ޚިދުމަތްދޭ ފަރާތްތަކުގެ ގޮތުގައި މޯލްޑިވްސް އިންލެންޑް ރެވެނިއު އޮތޯރިޓީގައި ރަޖިސްޓްރީކޮށްފައިވާ ހުރިހާ ވިޔަފާރިއެއް މިހިނގާ އޮކްޓޫބަރ މަހުގެ 31 ގެ ކުރިން އެމްއެމްއޭގެ އެފްއެކްސް ޕޯޓަލް މެދުވެރިކޮށް ރަޖިސްޓްރީ ވާންޖެހޭ ކަމަށެވެ.

މި ގަވާއިދުގެ ދަށުން، ފަތުރުވެރިކަމުގެ ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެއެވެ. މިގޮތުން:

- ކެޓަގަރީ "އޭ" (ރިސޯޓުތައް، ހޮޓާތައް، ޓޫރިސްޓް އުޅަނދުތައް): ކޮންމެ ޓޫރިސްޓަކަށް 500 ޑޮލަރުގެ ރޭޓުން

- ކެޓަގަރީ "ބީ" (ގެސްޓްހައުސްތައް، 50 ކޮޓަރި ނުވަތަ އެއަށްވުރެ މަދު ކޮޓަރި ހުންނަ ހޮޓާތައް): ކޮންމެ ޓޫރިސްޓަކަށް 25 ޑޮލަރުގެ ރޭޓުން

މި އަދަދުތައް ކޮންމެ މީލާދީ މަހެއް ނިމި، އޭގެ ފަހުން ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަންޖެހޭނެއެވެ.

އިޤްތިޞާދީ މާހިރުން ދެކޭގޮތުގައި މި ގަވާއިދުގެ ސަބަބުން ރާއްޖޭގެ އިޤްތިޞާދީ ހާލަތު ރަނގަޅުވެ، ޑޮލަރުގެ ކަޅުބާޒާރު ހުއްޓުވުމަށް ފަސޭހަވެގެންދާނެއެވެ.