އެމްޑީޕީން ސިޔާސީ ތަމްރީނު ދޭ މަރުކަޒެއް ގާއިމުކުރަން ނިންމައިފި

އެމްޑީޕީން ސިޔާސީ ދާއިރާއިން ތައުލީމާއި ތަމްރީނު ދިނުމަށް އެކަޑަމީއެއް ނުވަތަ މަރުކަޒެއް ގާއިމު ކުރުމަށް ނިންމައި، އެކަން އެ ޕާޓީގެ ގައުމީ މަޖިލީހަށް ރޭ ހުށަހަޅައިފިއެވެ.

ރޭ ބޭއްވުނު ގައުމީ މަޖިލީހުގެ ޖަލްސާގައި އެމްޑީޕީގެ ޗެއާޕާސަން ފައްޔާޒު އިސްމާއީލް ވަނީ ކުރިއަށް އޮތް ތަނުގައި އެމްޑީޕީއިން ކުރަން ނިންމާފައިވާ ތިން ކަމެއް ހުށަހަޅުއްވާފައެވެ. އޭގެ ތެރޭގައި ހިމެނެނީ:

1. ސިޔާސީ ދާއިރާއިން ކިޔަވައިދިނުމަށް އެކަޑަމީއެއް ހުޅުވުން

2. ތިންކް ޓޭންކެއް އުފެއްދުން

3. މާލީ ގޮތުން އަމިއްލައަށް ބާރުވެރިވުމަށް ރިއަލް އެސްޓޭޓް ވިޔަފާރިކުރުން

ފައްޔާޒު ވިދާޅުވި ގޮތުގައި އެމްޑީޕީގެ މަގްސަދަކީ ސިޔާސީ މައިދާނަށް ނުކުންނަ މީހުންނަކީ ގާބިލް، ސިޔާސީ ކަންކަމަށް ރަނގަޅަށް ރޯފިލާފައި ތިބި ބަޔަކަށް ހެދުމެވެ. އެހެންކަމުން، މިނިވަން މުއައްސަސާއެއްގެ ގޮތުގައި ސިޔާސީ އެކަޑަމީއެއް ހިންގުމަށް ބޭނުންވާ ކަމަށް އޭނާ ވިދާޅުވިއެވެ.

ޖަލްސާގައި ބައިވެރިވި މެމްބަރުން މި ހުށަހެޅުމަށް ފުރިހަމައަށް ތާއީދުކުރެއްވިއެވެ. މެމްބަރުން ދެކޭގޮތުގައި ގައުމު ހިންގަނީ ސިޔާސީ ޕާޓީތަކަށް ނިސްބަތްވާ ފަރާތްތަކުން ކަމަށްވާތީ، ސިޔާސީ ދާއިރާއިން ތައުލީމާއި ތަޖުރިބާ ލިބިފައިވާ ބަޔަކު ތިބުމަކީ ދުޅަހެޔޮ ޑިމޮކްރެޓިކް ވެއްޓެއް ގާއިމުކުރުމަށް މުހިންމު ކަމެކެވެ.

އެމްޑީޕީގެ އަންހެނުންގެ ރޫހުގެ ރައީސާ ރޮޒައިނާ އާދަމް ވިދާޅުވި ގޮތުގައި މިފަދަ އެކަޑަމީއެއް ހުރެއްޖެނަމަ، ޝައުގުވެރިކަން ހުންނަ އަންހެނުންނަށް ސިޔާސީ ދާއިރާއިން ކިޔެވުމުގެ ފުރުސަތު ލިބިގެންދާނެއެވެ.

ފައްޔާޒު އިސްމާއީލް ފާހަގަކުރެއްވި ގޮތުގައި މިފަދަ ތަނެއް ގާއިމުކުރުމަށް އޮތް އެންމެ ބޮޑު ގޮންޖެހުމަކީ، ސިޔާސީ ޕާޓީއަކުން، ޕާޓީގެ ނަމުގައި މިފަދަ ކަމެއް ކުރުމާ މެދު ގާނޫނާއި ގަވާއިދުގައި އޮންނަ ގޮތް ސާފު ނުވުމެވެ.

ޖަލްސާގައި ހުށަހެޅުނު އެހެނިހެން ކަންކަމަށްވެސް މެމްބަރުން ތާއީދުކުރެއްވިއެވެ. މިއީ ޕާޓީ ހިންގުމަށް ކޮންމެހެން ކުރަންޖެހޭ ކަންކަން ކަމަށް މެމްބަރުން ދެކެވަޑައިގަންނަވައެވެ.