ޑިވެލޮޕްމަންޓް ބޭންކު އުފެދުމުން ރިސޯޓު ތަރައްޤީކުރުމަށް އިތުރު ފުރުޞަތު ފަހިވާނެ: ގަވަރުނަރު

މޯލްޑިވްސް ޑިވެލޮޕްމަންޓް ބޭންކު (ޑީބީއެމްއެލް) އުފެދުމުން ރާއްޖޭގެ ޓުއަރިޒަމް ދާއިރާގައި ހަދަމުންދާ އަދި މަސައްކަތް ހުއްޓިފައިވާ ރިސޯޓުތަކަށް މާލީ އެހީތެރިކަން ފޯރުކޮށްދިނުމަށް އިތުރު ފުރުޞަތުތަކެއް ފަހިވެގެންދާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.

ގަވަރުނަރު މިހެން ވިދާޅުވީ ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަފުޅު ދައްކަވަމުންނެވެ. އޭނާ ވިދާޅުވީ ޑިވެލޮޕްމަންޓް ބޭންކަށް މިހަފުތާ ތެރޭގައި ލައިސަންސް ދޫކުރުމަށް އެމްއެމްއޭގެ ބޯޑުން ނިންމާފައިވާ ކަމަށެވެ.

ގަވަރުނަރު ފާހަގަކުރެއްވި ގޮތުގައި މިހާރު ރާއްޖޭގެ ބޭންކިންގ ނިޒާމުގައި ރިސޯޓު ތަރައްޤީކުރުމަށް ބޭނުންވާ މިންވަރަށް މާލީ އެހީތެރިކަން ދިނުމުގެ ޤާބިލުކަން ނެތެވެ. އެހެންކަމުން، ޑިވެލޮޕްމަންޓް ބޭންކު އުފެދުމުން މިފަދަ މަޝްރޫޢުތަކަށް ފައިނޭންސް ހޯދުމުގެ ފުރުޞަތު ފަހިވެގެންދާނެ ކަމަށް އޭނާ ވިދާޅުވިއެވެ.

"ބޭންކުން ވަރަށް ބޮޑަށް ސަމާލުކަން ދޭންޖެހޭނީ ޓުއަރިޒަމް އިންޑަސްޓްރީގެ ހަދަމުންދާ ނުވަތަ މަސައްކަތް ހުއްޓިފައިވާ ރިސޯޓުތަކަށް" ގަވަރުނަރު ވިދާޅުވިއެވެ.

މީގެ އިތުރުން، ޑިވެލޮޕްމޮޕްމަންޓް ބޭންކުގެ ސަބަބުން ބޭރުން ފައިނޭންސް ހޯދުމުގެ ބަދަލުގައި ރާއްޖޭގެ ބޭންކިންގ ނިޒާމުގެ ތެރެއިން ކަނޑައެޅޭ އުސޫލުތަކެއްގެ ދަށުން ފައިނޭންސް ހޯދުމުގެ ފުރުޞަތު ލިބިގެންދާނެ ކަމަށް ވެސް ގަވަރުނަރު ވިދާޅުވިއެވެ.

ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް އުފެއްދެވީ މިއަހަރުގެ މޭ 16 ގައި ކަމަށާއި، މި ބޭންކުގެ މައިގަނޑު މަޤްޞަދުތަކުގެ ތެރޭގައި ދެމެހެއްޓެނިވި އިޤްތިޞާދީ އަދި އިޖުތިމާއީ ތަރައްޤީއަށް އިންވެސްޓުކުރުމާއި، އުމްރާނީ ތަރައްޤީއަށް ބޭނުންވާ ފައިސާ ހޯދުން ހިމެނެއެވެ.