ފަލަސްތީނަށް މަހުން މަހަށް އެހީތެރިކަން ފޯރުކޮށްދިނުމަށް ސައުދީން ނިންމައިފި

ފަލަސްތީނުގެ ރައްޔިތުންނަށް ކޮންމެ މަހަކު މާލީ އެހީތެރިކަން ފޯރުކޮށްދިނުމަށް ސައުދީ އަރަބިއާއިން ނިންމައިފިއެވެ.

ސައުދީ އަރަބިއާއިން ހާމަކުރި ގޮތުގައި މި ނިންމުން ނިންމާފައިވަނީ ޣައްޒާ އާއި އެ ސަރަހައްދުގައި ޔަހޫދީން ހިންގަމުންދާ ލާއިންސާނީ އަމަލުތަކުގެ ސަބަބުންނެވެ.

ސައުދީ އަރަބިއާއިން މި ކަން އިޢުލާނުކުރި ނަމަވެސް، ފޯރުކޮށްދޭނެ އެހީގެ މިންވަރު ހާމަކޮށްފައެއް ނުވެއެވެ. އެހެންނަމަވެސް، މި އެހީއަކީ ފަލަސްތީނުގެ ރައްޔިތުންނަށް ކޮންމެ މަހަކު ލިބޭނެ އެހީއެއް ކަމަށް ބުނެފައިވެއެވެ.

މީގެ އިތުރުން، ސައުދީ އަރަބިއާގެ ސަލްމާން ރަސްގެފާނާއި ބޮޑުވަޒީރު އަދި ވަލީ އަހުދު މުޙައްމަދު ބިން ސަލްމާން ވަނީ ފަލަސްތީނުގެ ރައްޔިތުންގެ ރައްކާތެރި ކަމަށާއި، އެ މީހުންނަށް ބޭނުންވާ އެހީތެރިކަން ފޯރުކޮށްދިނުމަށް ބައިނަލްއަޤްވާމީ މުޖުތަމަޢުގެ މެންބަރުންނާއެކު މަސައްކަތްތަކެއް ކުރަމުންދާ ކަމަށް ވެސް ބުނެފައެވެ.

ސައުދީ އަރަބިއާއިން އިތުރަށް ބުނެފައިވަނީ ފަލަސްތީނަށް ފުރިހަމަ މިނިވަންކަން ހޯދައިދިނުމަށް އިސްކަންދޭ ކަމަށާއި، ޣައްޒާގައި އިސްރާއީލުން ހިންގަމުންދާ އުދުވާނީ ޢަމަލުތައް ހުއްޓުވުމަށާއި ޣައްޒާގެ ހާލަތު ރަނގަޅުކުރުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށެވެ.

މި ނިންމުމަކީ ފަލަސްތީނުގެ ރައްޔިތުންނަށް ލިބިގެންދާނެ މުހިންމު އެހީތެރިކަމެއް ކަމަށް ބެލެވޭއިރު، ސައުދީ އަރަބިއާގެ މި ފިޔަވަޅަކީ އިސްލާމީ އުއްމަތުގެ އެހެން ޤައުމުތަކަށް ވެސް ނަމޫނާއެއް ކަމުގައި ސިޔާސީ ފަރާތްތަކުން ދެކެއެވެ.