އާ ފޮރިން މިނިސްޓަރު ޑރ. ޚަލީލު އިންޑިއާގެ ސަފީރާ ބައްދަލުކުރައްވައިފި
ޑރ.ޚަލީލު އިންޑިއާ ސަފީރާއި ބައްދަލުކުރެއްވުން
އައު ފޮރިން މިނިސްޓަރު ޑރ. އަބްދުﷲ ހަލީލު، އިންޑިއާގެ ސަފީރު މުނޫ މަހާވަރުއާ ބައްދަލުކުރައްވައިފިއެވެ. މިއީ ހަލީލު ފޮރިން މިނިސްޓަރުކަމަށް އައްޔަންކުރެއްވުމަށްފަހު ބޭއްވެވި ފުރަތަމަ ރަސްމީ ބައްދަލުވުމެވެ.
ބައްދަލުވުމުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެވުނު ކަމަށް ހަލީލު ވިދާޅުވިއެވެ. މި ބައްދަލުވުން ބޭއްވުނީ ރައީސް ޑރ. މުހައްމަދު މުއިއްޒު އިންޑިއާއަށް ރަސްމީ ދަތުރުފުޅެއް ކުރެއްވުމަށް ހަމަޖެހިފައިވާ ދަނޑިވަޅެއްގައެވެ.
ރައީސްގެ މި ދަތުރުފުޅުގައި ސަރުކާރުގެ މާލީ ހާލަތު ރަނގަޅުކުރުމަށް އިންޑިއާގެ އެހީތެރިކަމަށް އެދިވަޑައިގަންނަވާނެ ކަމަށް ބެލެވެއެވެ. މިއީ ދެ ގައުމުގެ ގުޅުން އިތުރަށް ރަނގަޅުކުރުމަށް އެޅޭ މުހިންމު ފިޔަވަޅެއް ކަމަށް ވެސް ބެލެވެއެވެ.
ފާއިތުވި މަސްތަކުގައި ދެ ގައުމުގެ ގުޅުމަށް އައި ބައެއް ހީނަރުކަން ފިލުވައިލުމަށް މި ބައްދަލުވުމުން މަގުފަހިވާނެ ކަމަށް ސިޔާސީ ދާއިރާގެ ތަޖުރިބާކާރުން ދެކެއެވެ. ޚާއްޞަކޮށް، ރާއްޖޭގެ ދަރަނީގެ ބޮޑު ބައެއް އިންޑިއާއަށް ދައްކަންޖެހިފައިވާއިރު، މި ދަރަނި އަދާކުރުމަށް ލުއިގޮތްތަކެއް ހޯދުމަށް މި ބައްދަލުވުމުން މަގުފަހިވެދާނެ ކަމަށް ބެލެވެއެވެ.
ކޮމެންޓް