ކުރީގެ ޗީފް އޮފް ޑިފެންސް ފޯސް ސިޔާމް ކުށުން ބަރީއަވެއްޖެ

ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް އަހުމަދު ޝިޔާމްގެ މައްޗަށް ކުރެވުނު ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދަޢުވާއިން އޭނާ ބަރީއަވެއްޖެއެވެ.

މިއަދު ކްރިމިނަލް ކޯޓުން ކުރި ހުކުމުގައި ބުނެފައިވަނީ ދައުލަތުން ކުރި ދަޢުވާ ސާބިތުނުވާ ކަމަށެވެ.

މި މައްސަލައިގައި ޝިޔާމްގެ މައްޗަށް ދަޢުވާ ކުރެވިފައިވަނީ ވިލިމާލޭގައި ހުންނަ ކޯސްޓްގާޑްގެ އެމްއާރުސީސީގެ އިމާރާތުގައި، 2017 ވަނަ އަހަރުން ފެށިގެން އޭނާގެ ބައްޕަ ދިރިއުޅެން ބެހެއްޓި ކަމަށް ބުނެއެވެ.

ގާޒީ އާމިނަތު އަޒްލިފާ ހުކުމް ކުރެއްވުމުގައި ފާހަގަކުރެއްވި ގޮތުގައި، ޝިޔާމްގެ ބައްޕަ ސިފައިންގެ ވީއައިޕީ ގެސްޓްހައުސްގައި ބެހެއްޓީ ނުފޫޒެއް ބޭނުންކޮށްގެންކަން ދައުލަތަށް ސާބިތުކޮށްދެވިފައި ނުވެއެވެ. އަދި ސިފައިންގެ ވީއައިޕީ ގެސްޓްހައުސްގައި މީހުން ބެހެއްޓުމަށް ޚާއްޞަ އުސޫލެއް ނެތްކަމާއި، ޗީފް ޑިފެންސްގެ ބިއުރޯއިން ހުއްދަ ދޭ ފަރާތްތައް އެތަނުގައި ބަހައްޓާކަން ވެސް ފާހަގަކުރެއްވިއެވެ.

ޝަރީޢަތުގައި ހެކިބަސް ދިން ސިފައިން ބުނެފައިވާ ގޮތުގައި، ޝިޔާމްގެ ބައްޕައަށް ފޯރުކޮށްދެވުނު ޚިދުމަތްތަކަށް ޑިފެންސް މިނިސްޓްރީއަށް ބިލް ކޮށްފައި ނުވެއެވެ. އަދި ޝިޔާމްގެ ބައްޕަގެ ކެއިންބުއިމާއި ދަތުރުފަތުރަށް ޚަރަދު ކުރީ ޝިޔާމްގެ އަމިއްލަ ފައިސާއިންކަން ވެސް ހެކިން ބުނެފައިވެއެވެ.

ޝިޔާމްގެ ދިފާޢުގައި ބުނެފައިވަނީ، އޭނާގެ ބައްޕަ އެ ތަނުގައި ބެހެއްޓެވީ ސިފައިންގޭގައި އޮންނަ އާދަކާދައިގެ ތެރެއިން ކަމަށެވެ. ސިފައިންގެ އެކި ރޭންކުތަކުގެ މީހުންގެ އާއިލާ މެންބަރުން ކުއްލި ހާލަތްތަކުގައި އެ ތަނުގައި ބަހައްޓާ ކަމަށް އޭނާ ވިދާޅުވިއެވެ.

މި މައްސަލައަކީ ކުރިން އެންޓި-ކޮރަޕްޝަން ކޮމިޝަނުން (އޭސީސީ) ބަލައި، ކޮރަޕްޝަން އެކުލެވިގެން ނުވާ ކަމަށް ނިންމާފައިވާ މައްސަލައެކެވެ. ނަމަވެސް، 2020 ވަނަ އަހަރު ޕްރޮސެކިއުޓަރ ޖެނެރަލްގެ އޮފީހުން އިތުރު ކަންތައްތަކެއް ފާހަގަކުރެވުނު ކަމަށް ބުނެ މައްސަލަ އަލުން ބަލައި ދަޢުވާކުރަން ނިންމިއެވެ.