ސަގާފަތާއި ތަރިކަ ދިރުވުމަށް އާޓްސް އެންޑް ކަލްޗަރ ސެންޓަރެއް ގާއިމުކުރަން ނިންމައިފި

ރާއްޖޭގެ ސަގާފަތާއި ތަރިކަ ރައްކާތެރިކޮށް، އުފެއްދުންތެރި ވިޔަފާރިވެރިންނަށް ފުރުސަތުތައް ފަހިކޮށްދިނުމުގެ މަޤްޞަދުގައި އާޓްސް އެންޑް ކަލްޗަރ ސެންޓަރެއް ގާއިމުކުރުމަށް މޯލްޑިވްސް ޕޮލިޓެކްނިކާއި ބިޒްނަސް ސެންޓަރ ކޯޕަރޭޝަން (ބީސީސީ) އާ ދެމެދު އެއްބަސްވުމެއްގައި ސޮއިކޮށްފިއެވެ.

ހަޔަރ އެޑިޔުކޭޝަން މިނިސްޓްރީން މަޢުލޫމާތު ދެއްވިގޮތުގައި، މި ސެންޓަރުގެ މައިގަނޑު މަޤްޞަދަކީ ޒުވާނުން ސަގާފީ ކަންކަމަށް ހޭލުންތެރިކުރުވުމެވެ. މީގެ އިތުރުން، އާންމުން ހޭލުންތެރިކުރުވައި، ވިޔަފާރިވެރިންނާއި އެކި ޖަމިއްޔާ އަދި ޖަމާއަތްތަކާ ގުޅިގެން ތަފާތު ގިނަ ހަރަކާތްތަކެއް ބޭއްވުމަށް ވެސް ވަނީ ރޭވިފައެވެ.

މި އެއްބަސްވުމުގައި ޕޮލިޓެކްނިކްގެ ފަރާތުން ސޮއިކުރެއްވީ އެ މުއައްސަސާގެ ސީއީއޯ، ދޫޝާން ކަމާލުއްދީނެވެ. އަދި ބީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް ސްޓްރެޓެޖިކް އޮފިސަރު މަރްޔަމް ނަޝާއެވެ.

ދިވެހިބަހާއި އަދަބިއްޔާތާއި ތާރީޚާއި ސަގާފަތާއި ތަރިކަ ދިރުވައި އާލާކުރުމުގެ އިތުރުން އެ ދާއިރާތަކުން އިގްތިސާދީ ނަފާ ހޯދުމަށް މަސައްކަތްކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. މި ގޮތުން، ސަލްޓަންޕާކުގައި ހުންނަ ތާރީޚީ އުސްގެކޮޅުގައި ދާރުލްއާސާރެއް ހެދުމަށް ވެސް މި ސަރުކާރުން ވަނީ ނިންމާފައެވެ.