ނޭޕާލުގައި ފެންބޮޑުވެ 170 މީހުން މަރުވެ 42 މީހުން ގެއްލިއްޖެ

ނޭޕާލުގައި ވަނީ ވަރަށް ބޮޑަށް ފެންބޮޑުވެފައި

ނޭޕާލަށް މިދިޔަ ދުވަސްތަކުގައި ކުރިމަތިވި ގަދަ ވިއްސާރައިގެ ސަބަބުން މިހާތަނަށް 170 އަށްވުރެ ގިނަ މީހުން މަރުވެ، 42 މީހުން ގެއްލިފައިވާ ކަމަށް އެ ގައުމުގެ ހޯމް މިނިސްޓްރީން ހާމަކޮށްފިއެވެ.

ބޯކޮށް ވެހުނު ވާރޭއާ ގުޅިގެން ގައުމުގެ ގިނަ ސަރަހައްދުތަކެއްގައި ފެންބޮޑުވެ، ކޯރުތައް ބަންޑުންވެ، އަދި ބިންގަނޑު ކަނޑައިގެން ގޮސްފައިވާ ކަމަށް ރިޕޯޓުތަކުން ބުނެއެވެ. މީގެ ސަބަބުން ބައެއް މައި މަގުތައް ބަންދުވެ، ގިނަ އަދަދެއްގެ މީހުން ދަތުރުފަތުރުގައި ތާށިވެފައިވާ ކަމަށްވެސް ބުނެވެއެވެ.

ހޯމް މިނިސްޓްރީގެ ތަރުޖަމާނު ރިޝީ ރާމް ތިވާރީ ވިދާޅުވީ، މަގުތައް ސާފުކޮށް އަލުން ހުޅުވުމުގެ މަސައްކަތް ހަލުވިކޮށް، ބާރަށް ކުރިއަށްދާ ކަމަށާއި، އަދި މިހާތަނަށް 3،000 އަށްވުރެ ގިނަ މީހުން ސަލާމަތްކުރެވިފައިވާ ކަމަށެވެ.

ނޭޕާލްގެ މޫސުމާބެހޭ އިދާރާއިން ބުނެފައިވަނީ، މިދިޔަ ހޮނިހިރު ދުވަހުގެ ނިޔަލަށް 24 ގަޑިއިރުގެ ތެރޭގައި ގައުމުގެ 14 ސަރަހައްދަކަށް ރެކޯޑު މިންވަރަކަށް ވާރޭވެހިފައިވާ ކަމަށެވެ. މޫސުމަށް އަންނަ ބަދަލުތަކާ ގުޅިގެން މިފަދަ ކާރިސާތައް އިތުރުވަމުންދާ ކަމަށް ތަޖުރިބާކާރުން ވަނީ އިންޒާރުދީފައެވެ.

މި އަހަރުގެ ތެރޭގައި ނޭޕާލްގައި ދިމާވި ފެންބޮޑުވުމުގެ އެކި ހާދިސާތަކުގައި މިހާތަނަށް ޖުމުލަ 220 މީހުން މަރުވެފައިވާ ކަމަށް އެ ގައުމުގެ ކާރިސާއާބެހޭ އިދާރާގެ ތެ ތަފާސްހިސާބުތަކުން ދައްކައެވެ.

ނޭޕާލް