ޓޮޓެންހަމް އިން ޔުނައިޓެޑްގެ ދަނޑުގައި ކުޅެ 3-0 ން މޮޅުވެއްޖެ

އިނގިރޭސި ޕްރިމިއަރ ލީގުގައި ރޭ ކުޅުނު މެޗުގައި މެންޗެސްޓަރ ޔުނައިޓެޑްގެ އޯލްޑް ޓްރެފޯޑް ދަނޑުގައި ޓޮޓެންހަމް ހޮޓްސްޕަރ އިން 3-0 އިން ބޮޑު މޮޅެއް ހޯދައިފި އެވެ.

މެޗު ފެށިގެން އެންމެ ތިން މިނިޓު ތެރޭގައި ޓޮޓެންހަމްގެ ބްރެނަން ޖޯންސަން ޖެހި ލަނޑުން އެ ޓީމުން ލީޑު ނެގި އެވެ. މި ލަނޑު ޖެހުމުގެ ކުރިން ޓޮޓެންހަމްގެ ޑިފެންޑަރު މިކީ ވެން ޑަ ވެން ވަނީ އަމިއްލަ ހާފުގެ ތެރެއިން ބޯޅަ ހިފައިގެން ގޮސް ޔުނައިޓެޑްގެ އޭރިއާ ތެރެއަށް ވަދެ، ޖޯންސަން އަށް ބޯޅަ ހުސްކޮށްލާފައި ނަގައިދީފަ އެވެ.

މެޗުގެ 42 ވަނަ މިނިޓުގައި ޔުނައިޓެޑްގެ ކެޕްޓަން ބްރޫނޯ ފެނާންޑޭސް އަށް ސީދާ ރަތް ކާޑެއް ދެއްކުމާ ގުޅިގެން ޔުނައިޓެޑަށް ބޮޑު ދަތިތަކެއް ކުރިމަތިވި އެވެ. ފެނާންޑޭސް އަށް ރަތް ކާޑު ދެއްކީ ޓޮޓެންހަމްގެ ޖޭމްސް މެޑިސަން އަށް ނުރައްކާތެރި ފައުލެއް ކުރުމުންނެވެ.

ދެވަނަ ހާފު ފެށިގެން ދެވަނަ މިނިޓުގައި ޓޮޓެންހަމްގެ ޑޭޖާން ކުލުސެވްސްކީ ޖެހި ލަނޑުން އެ ޓީމުގެ ލީޑު ފުޅާކުރިއެވެ. އަދި މެޗުގެ 77 ވަނަ މިނިޓުގައި ޑޮމިނިކް ސޮލާންކޭ ޖެހި ލަނޑުން ޓޮޓެންހަމް އިން 3  ޕޮއިންޓް ކަށަވަރުކުރިއެވެ.

މި މޮޅާ އެކު، ކުޅުނު ހަ މެޗުން 10 ޕޮއިންޓާ އެކު ޓޮޓެންހަމް ވަނީ ލީގުގެ އަށްވަނައަށް ޖެހިލައިފައެވެ. އެހެންނަމަވެސް ކުޅުނު ހަ މެޗުން ހަތް ޕޮއިންޓާ އެކު ޔުނައިޓެޑް އޮތީ ލީގުގެ 12 ވަނައިގަ އެވެ.

މެޗަށް ފަހު ޔުނައިޓެޑްގެ ކޯޗު އެރިކް ޓެން ހާގް ވަނީ ފެނާންޑޭސް އަށް ރަތް ކާޑު ދެއްކި ހިސާބަކީ މެޗުގެ ކަންކަން ބަދަލުވި ހިސާބުކަމަށާއި، މި ނަތީޖާ އަކީ ބަލައިގަންނަން އުނދަގޫ ނަތީޖާއެއް ކަމަށް ބުނެފަ އެވެ.