ރާއްޖެއަށް އެހީތެރިވުމަށް ޔޫއޭއީ ތައްޔާރަށް އޮތްކަމަށް އެ ގައުމުން ބުނެފި

ރާއްޖެއަށް ބޭނުންވާ ކޮންމެ ދާއިރާއަކުން އެހީތެރިކަން ފޯރުކޮށް ދިނުމަށް ޔޫއޭއީ ތައްޔާރަށް އޮތް ކަމަށް އެ ގައުމުން ބުނެފިއެވެ.

ޔޫއޭއިން މި ފަދައިން ބުނެފައި ވަނީ  އދ. ގެ އާންމު މަޖިލީހުގެ 79 ވަނަ ސެޝަންގެ ތެރޭގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޔޫއޭއީގެ ބޮޑުވަޒީރުގެ ނައިބު އަދި ޚާރިޖީ ވަޒީރު ހިޒް ހައިނަސް، ޝައިޚް ޢަބްދުﷲ ބިން ޒާއިދު އާލް ނަހްޔާނާ ބައްދަލުކުރައްވާ ކުރެއްވި މަޝްވަރާގެ ތެރޭގައެވެ.  

މި ބައްދަލުވުމުގައި ރައީސް މުޢިއްޒު ވަނީ ރާއްޖޭގެ މިހާރުގެ ޙާލަތާ ބެހޭގޮތުން މަޢުލޫމާތު ދެއްވައި، އިޤްތިޞާދީ ތަރައްޤީ، އިންވެސްޓްމަންޓް އަދި ޞިއްޙީ ދާއިރާގެ ކުރިއެރުމަށް ބޭނުންވާ އެހީތެރިކަން ފާހަގަކުރައްވާފައެވެ.

ޝައިޚް ޢަބްދުﷲ ބިން ޒާއިދު އާލް ނަހްޔާން ވަނީ ރާއްޖެއަށް އެހީތެރިކަން ފޯރުކޮށްދެވެން އޮތް ކޮންމެ ދާއިރާއަކުންވެސް އެހީތެރިވުމަށް ޔޫއޭއީ ތައްޔާރަށް އޮތް ކަމުގެ ޔަޤީންކަން ދެއްވާފައެވެ.

ދެ ޤައުމުގެ ދެމެދުގައި އޮތް ޒަމާންވީ ގާތް ގުޅުމުގެ މުހިއްމުކަން ފާހަގަކުރައްވައި، ސިޔާސީ ގުޅުން އިތުރަށް ހަރުދަނާކޮށް، އިސްކަންދޭ ކަންކަމުގައި އެކުގައި މަސައްކަތްކުރުމަށް ދެ ފަރާތުންވެސް އެއްބަސްވެފައިވެއެވެ. މި ބައްދަލުވުމަކީ ދެ ޤައުމުގެ ގުޅުން އިތުރަށް ބަދަހިކޮށް، އެކުވެރިކަން ވަރުގަދަކުރުމަށް މަގުފަހިވާނެ ބައްދަލުވުމެއް ކަމަށް ބެލެވެއެވެ.