ޝަހުސު އޮޅުވާލައިގެން ރާއްޖެ އެތެރެވާން އުޅުނު ތިން ބިދޭސީން ހިފަހައްޓައިފި

ޝަހުސު އޮޅުވާލައިގެން ރާއްޖެ އެތެރެވާން އުޅުނު ތިން ބިދޭސީން މޯލްޑިވްސް އިމިގްރޭޝަންގެ ބޯޑަރ އިންޓަލިޖެންސް ޑިވިޝަނުން ހިފަހައްޓައިފިއެވެ.

މި ތިން މީހުން ހިފަހައްޓާފައިވަނީ ވެލާނާ އިންޓަރނޭޝަނަލް އެއާޕޯޓުގައެވެ.

އިމިގްރޭޝަނުން މަޢުލޫމާތު ދީފައިވާ ގޮތުގައި، މި ތިން މީހުން ހިފަހައްޓާފައިވަނީ ވަކިވަކިންނެވެ. ފުރަތަމަ މީހާ ހިފަހައްޓާފައިވަނީ ޖުލައި 31 ވަނަ ދުވަހު އެވެ. އޭނާއަކީ 25 އަހަރުގެ ފިރިހެނެކެވެ. ދެވަނަ މީހާ ހިފަހައްޓާފައިވަނީ އޮގަސްޓް 16 ވަނަ ދުވަހުއެވެ. އޭނާއަކީ 23 އަހަރުގެ ފިރިހެނެކެވެ. އަދި ތިންވަނަ މީހާ ހިފަހައްޓާފައިވަނީ އޮގަސްޓް 18 ވަނަ ދުވަހުއެވެ. އޭނާއަކީ 21 އަހަރުގެ ފިރިހެނެކެވެ.

އިމިގްރޭޝަނުން އިތުރަށް ބުނެފައިވަނީ މީގެ ކުރިން ވެސް ނަކަލުކޮށްފައިވާ ޕާސްޕޯޓުތަކެއް އަދި ވައްތަރު މީހެއްގެ ޕާސްޕޯޓް ބޭނުންކޮށް ޝަހުސް އޮޅުވާލައިގެން ރާއްޖެ އެތެރެވާން އުޅުނު އެތައް ބަޔަކު ހުއްޓުވާ، ރާއްޖެއިން ފޮނުވާލާފައިވާ ކަމަށެވެ.

މީގެ އިތުރުން، ގަވާއިދާ ޚިލާފަށް ރާއްޖޭގައި އުޅޭ ބިދޭސީން އަތުލައިގަތުމަށް އިމިގްރޭޝަނާއި ކަމާ ގުޅުން ހުރި އެހެނިހެން އިދާރާތަކުން ބޮޑު އޮޕަރޭޝަނެއް ކުރިއަށްދާ ކަމަށްވެސް އިމިގްރޭޝަނުން މަޢުލޫމާތު ދީފައިވެއެވެ.