ވޭޕިންގ މައްސަލައާ ގުޅޭ މަޝްވަރާތައް ސްކޫލްތަކާއެކު ފަށައިފި

މިއަދު ބޭއްވުނު މަޝްވަރާގެ ތެރެއިން/ ފޮޓޯ:އެޑިޔުކޭޝަން

ވޭޕް ކުރުމުގެ ނުރައްކާތެރި އާދައާ ގުޅޭ ކަންބޮޑުވުންތަކާ ގުޅޭގޮތުން މަޝްވަރާކުރުމަށް، ތަޢުލީމީ ދާއިރާގެ އިސްވެރިންނާއެކު ސިލްސިލާ ބައްދަލުވުންތަކެއް ފަށައިފިއެވެ.

މި ބައްދަލުވުންތައް ފެށީ މީގެ ދެ ދުވަސް ކުރިންނެވެ. ފުރަތަމަ ބައްދަލުވުމުގައި ރާއްޖޭގެ ޑޮކްޓަރުންނާއި ތަޢުލީމާ ބެހޭ ވަޒީރު ޑރ. އިސްމާޢީލް ޝަފީޢު ބައިވެރިވެވަޑައިގެންނެވިއެވެ. މި ބައްދަލުވުން އަމާޒުކުރެވިފައިވަނީ މާލޭ ސަރަހައްދުގެ ސްކޫލުތަކަށެވެ.

މީގެ އިތުރުން، އަތޮޅުތެރޭގެ ސްކޫލުތަކުގެ އިސްވެރިންނާއެކު އޮންލައިން ބައްދަލުވުމެއް މިއަދު ބާއްވާފައިވެއެވެ. މި ބައްދަލުވުންތަކުގައި އެތެރެހަށީގެ ހާއްސަ ޑޮކްޓަރު ޑރ. މުޙައްމަދު ޢަލީ ވެސް ބައިވެރިވެވަޑައިގަންނަވައެވެ.

ދުންފަތް އެކުލެވޭ އެކި ބާވަތްތަކާއި ވޭޕް ރާއްޖެ އެތެރެކުރުން މަނާކުރުމަށް ގޮވާލާ އަޑު ރާއްޖޭގައި ވަނީ ގަދަވެފައެވެ. މިގޮތުން ދާދި ފަހުން ދިވެހި ޑޮކްޓަރުންގެ ޖަމްޢިއްޔާ، މޯލްޑިވިއަން މެޑިކަލް އެސޯސިއޭޝަން (އެމްއެމްއޭ) އިންވެސް ވަނީ އެކަމަށް ގޮވާލާފައެވެ.

އެމްއެމްއޭއިން ނެރުނު ބަޔާނެއްގައި ބުނެފައިވަނީ، ދުންފަތަކީ އެތައް ހާސް ކެމިކަލް މާއްދާއާއި 250 ވިހަ އެކުލެވޭ އެއްޗެއް ކަމަށާއި، އޭގެ ތެރެއިން 70 މާއްދާއިން ކެންސަރަށް މަގުފަހިވާކަން ދިރާސާތަކުން ދައްކާ ކަމަށެވެ. އަދި ދުންފަތުގެ ނުސީދާ ދުމަށް ހުށަހެޅުމުން ކުޑަކުދިންނަށް ނޭވާ ހިއްލުމާއި ފުއްޕާމޭގައި ޖަރާސީމު އަށަގަތުމާއި ލޭގެ ކެންސަރު ޖެހުން ފަދަ ސިއްޙީ މައްސަލަތައް ދިމާވާ ކަމަށް ވެސް ވަނީ ބުނެފައެވެ.

އެޑިއުކޭޝަން މިނިސްޓްރީ