ސްކޭމް މައްސަލަތަކުން 2.2 މިލިއަން ރުފިޔާ އަނބުރާ ހޯދައިފި

މިއަހަރުގެ ފުރަތަމަ އަށް މަސްދުވަހުގެ ތެރޭގައި އެކަނިވެސް ސްކޭމް މައްސަލަތަކުން 2.2 މިލިއަން ރުފިޔާ އަނބުރާ ހޯދިފައިވާކަމަށް އެސިސްޓަންޓް ކޮމިޝަނަރ އޮފް ޕޮލިސް އަޙުމަދު ޝިފާން ވިދާޅުވެއްޖެއެވެ.

އޭސީޕީ ޝިފާން މިހެން ވިދާޅުވެފައިވަނީ މިއަދު އެކްސްގައި ޝާއިއުކުރެއްވި ޕޯސްޓެއްގައެވެ. އެ ޕޯސްޓުގައި އޭނާ ފާހަގަކުރެއްވި ގޮތުގައި ގިނަ އަދަދެއްގެ ރައްޔިތުން ސްކޭމްތަކަށް އަދިވެސް ސަމާލުނުވާކަން ފާހަގަކުރެވެއެވެ. އަދި ގިނަ ބަޔަކު ސްކޭމްކުރާ މީހުންގެ ސްކީމްތަކުގެ ޝިކާރައަކަށް ވެގެން ދިއުމަކީ ހިތާމަހުރި ކަމެއްކަމަށް އޭނާ ވިދާޅުވިއެވެ.

ރާއްޖޭގެ އެކި ވުޒާރާތަކާއި، އޮފީސްތަކުގެ އިތުރުން އިދާރާތަކުގެ ނަމުގައި ރައްޔިތުންނަށް ގުޅައި އެކައުންޓުގެ މައުލޫމާތު ހޯދައިގެން އެމީހުންގެ އެކައުންޓްތަކުގައި ހުންނަ ފައިސާ ފޭރުމުގެ މައްސަލަތައް ވަނީ ވަރަށް ބޮޑަށް އިތުރުވެފައިކަން އޭސީޕީ ޝިފާން ފާހަގަކުރެއްވިއެވެ.

ސްކޭމްތައް ހުއްޓުވުމަށް ފުލުހުން އަންނަނީ ގިނަ މަސައްކަތްތަކެއް ކުރަމުންނެވެ. މީގެ ތެރޭގައި އާންމުން ހޭލުންތެރި ކުރުވުމުގެ މަސައްކަތްތައް ވެސް ހިމެނެއެވެ. ފުލުހުން އާންމުންނަށް އިލްތިމާސްކުރަނީ ބޭންކް އެކައުންޓަށް އެކްސެސް ވެވޭނެ މަގުތައް ބަންދު ކުރުމަށް އެއްވެސް ކޯޑެއް އެއްވެސް މީހަކާއި ހިއްސާ ނުކުރުމަށާއި، ގޮތް ނޭނގޭ މީހުންނަށް ޓްރާންސްފާކޮށް ފައިސާގެ މުއާމަލާތްތައް ނުކުރުމަށެވެ.

މި މަހުގެ 31 ވަނަ ދުވަހު ފުލުހުންގެ އެންޓި-ސްކޭމް ސެންޓަރުގެ ހެޑް އަދި އިންސްޕެކްޓާ އޮފް ޕޮލިސް މަރިޔަމް ރަޝީދާ ވިދާޅުވެފައިވަނީ މި އަހަރުގެ އެހާތަނަށް ސްކޭމްގެ އެކި މައްސަލަތަކާ ގުޅިގެން 500 އަށް ވުރެ ގިނަ ބޭންކް އެކައުންޓް ބްލޮކް ކޮށްފައިވާ ކަމަށެވެ. މީގެ އިތުރުން 782 ޑިވައިސް ނެޓްވޯކުން ބްލޮކް ކޮށް، 297 ސިމްކާޑު ޓާމިނޭޓްކޮށް، އަދި 70 ވެބް ލިންކް ބްލޮކް ކުރެވިފައިވާ ކަމަށް ވެސް އޭނާ ވިދާޅުވިއެވެ.

އިންސްޕެކްޓާ މަރިޔަމް އިތުރަށް ވިދާޅުވީ ފުލުހަށް ހުށަހަޅާފައިވާ ސްކޭމްގެ މައްސަލަތަކުގެ ތެރެއިން 156 މައްސަލައެއްގައި ދައުވާކުރަން މިހާރު ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށެވެ. އަދި އޭގެ ތެރެއިން ގިނަ މައްސަލަތަކުގެ ޝަރީއަތް މިހާރު ފަށާފައިވާ ކަމަށް ވެސް އޭނާ ވިދާޅުވިއެވެ.