އެފްރިކާގައި އެމްޕޮކްސް ފެތުރޭ މިންވަރު އިންތިހާއަށް އިތުރުވެއްޖެ

އެފްރިކާގެ ގައުމުތަކުގައި އެމްޕޮކްސް ފެތުރޭ މިންވަރު އިންތިހާއަށް އިތުރުވެއްޖެ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ) އިން ހާމަކޮށްފިއެވެ.

ޑަބްލިޔުއެޗްއޯ އިން ހާމަކުރި ގޮތުގައި، އެފްރިކާ ބައްރުގެ ބައެއް ޤައުމުތަކުގައި ހަލުވިކަމާއެކު ފެތުރެމުންދާ ގައިންގަޔަށް އަރާ ނުރައްކާތެރި ބައްޔެއް ކަމުގައިވާ އެމްޕޮކްސް (މަކުނުވިދުރި ނުވަތަ މަންކީޕޮކްސް) ބަލި، މި އަހަރުގެ މިހާތަނަށް ޖެހިފައިވާ ކަމަށް ޝައްކު ކުރެވޭ މީހުންގެ ޢަދަދު 30،000 އަށް އުފުލިފައިވެއެވެ.

އެމްޕޮކްސް ޖެހިގެން މި އަހަރުގެ މިހާތަނަށް މަރުވެފައިވާ މީހުންގެ ޢަދަދު 800 އަށް އުފުލިފައިވާކަމަށް ޑަބްލިޔުއެޗްއޯ އިން ބުނެފައިވެއެވެ. މި ބަލި އެންމެ ހަލުވިކަމާއެކު ފެތުރެމުން ދަނީ ޑިމޮކްރެޓިކް ރިޕަބްލިކް އޮފް ކޮންގޯގައެވެ. ކޮންގޯގެ އިތުރުން، އެ ޤައުމާ އިންވެގެން އޮތް ބުރުންޑީގައި ވެސް ހަލުވިކަމާއެކު ބަލި ފެތުރެމުންދާ ކަމަށާއި، އެ ޤައުމުގައި ބަލި ޖެހިފައިވާ މީހުންގެ ޢަދަދު އިތުރުވަމުންދާ ކަމަށްވެސް އެ އިދާރާއިން ހާމަކޮށްފައިވެއެވެ.

ދުނިޔޭގެ އެކި ކަންކޮޅުތަކަށް މި ބަލި ފެތުރި، ބަލިމަޑުކަމެއް ފެށިދާނެ ކަމުގެ ނުރައްކާ ބޮޑުވުމާ ގުޅިގެން ޑަބްލިޔުއެޗްއޯ އިން އޮގަސްޓު މަހުގެ ކުރީކޮޅު ވަނީ ޢާންމު ޞިއްޙަތުގެ ނުރައްކަލުގެ ހާލަތު އިޢުލާނު ކޮށްފައެވެ. ކޮންގޯގައި ބަލި ފެތުރެން ފަށާފައި ވަނީ 2023 ޖަނަވަރީގައެވެ.

އެފްރިކާ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (އެފްރިކާ ސީޑީސީ) އިން ބުނެފައިވަނީ، 2022 ވަނަ އަހަރާ އަޅައިބަލާއިރު، 2023 ވަނަ އަހަރު ބަލީގެ ކޭސްތަކުގެ ޢަދަދު ވަނީ 78.5 އިންސައްތަ އިތުރުވެ، އެފްރިކާގެ ހަތް ސްޓޭޓެއްގައި ބަލި ފެތުރެން ފަށާފައެއެވެ.

އެފްރިކާ ބައްރުގައި ހަލުވިކަމާއެކު އެމްޕޮކްސް ބަލި ފެތުރުން ކޮންޓްރޯލް ކުރުމަށް ބޮޑެތި ގޮންޖެހުންތަކެއް އޮތީ ކުރިމަތިވެފައެވެ. އޭގެ ތެރޭގައި، ބައްޔަށް ޚާއްޞަ ކޮށްފައިވާ ވެކްސިން އެ ޤައުމުތަކުގައި ލިބެން ނެތުމާއި، އެ ބައްރުގެ ޤައުމުތަކުގެ ޞިއްޙީ ނިޒާމު ބަލިކަށިވުން ހިމެނެއެވެ. މި ކަމަށް އެހީތެރިކަން ފޯރުކޮށްދިނުމަށް ބައިނަލްއަޤުވާމީ މުޖުތަމަޢުން މަސައްކަތްތަކެއް ފަށާފައިވެއެވެ.