ރެއާލް މެޑްރިޑުން އަލަވޭސްއާ ދެކޮޅަށް ކުޅެ ކުޑަ ފަރަގަކުން މޮޅުވެއްޖެ

ސްޕެނިޝް ލީގުގައި އެންމެފަހުގެ  ޗެމްޕިއަން ރެއާލް މެޑްރިޑުން ރޭ ކުޅުނު މެޗު ޑިޕޯޓިވޯ އަލަވޭސްއާ ދެކޮޅަށް ކުޅެ 3-2 ގެ ކުޑަ ފަރަގަކުން މޮޅުވެއްޖެއެވެ.

ރެއާލްގެ ސަންތިއާގޯ ބަރުނަބިއު ސްޓޭޑިއަމްގައި ކުޅުނު މި މެޗުގައި ރެއާލްގެ ފުރަތަމަ ގޯލު ޖެހީ ކެޕްޓަން ލޫކަސް ވަޒްކޭޒެވެ. އޭނާ މި ގޯލު ޖެހީ މެޗު ފެށިގެން އެންމެ ފުރަތަމަ މިނެޓުގެ ތެރޭގައެވެ. ދެވަނަ ގޯލު ޖެހީ ކީލިއަން އެމްބާޕޭއެވެ. އެއީ މެޗުގެ 40 ވަނަ މިނެޓުގައެވެ. ރެއާލްގެ ތިންވަނަ އަދި ފަހު ގޯލު ޖެހީ ރޮޑްރީގޯއެވެ. އެއީ ދެވަނަ ހާފުގެ ތިންވަނަ މިނެޓުގައެވެ.

އަލަވޭސްގެ ފަރާތުން ދެ ގޯލު ޖެހީ މެޗުގެ ފަހު ކޮޅުގައެވެ. އެގޮތުން 85 ވަނަ މިނެޓުގައި ޕްރޮޓޮސޯނީ ޖެހި ގޯލާއެކު، 86 ވަނަ މިނެޓުގައި ކިކީ ގާސިއާ ޖެހި ގޯލުން އަލަވޭސްއިން ވަނީ ރެއާލްއަށް ސިހުން ގެނުވާފައެވެ.  ނަމަވެސް ރެއާލްއިން ވަނީ ފަހު މިނެޓުތަކުގައި ރަނގަޅަށް ޑިފެންސްކޮށް ލީޑު ހިފަހައްޓައި މެޗުގައި މޮޅުވެފައެވެ.

މި މޮޅުވުމާއެކު ރެއާލް މެޑްރިޑް މިހާރު އޮތީ ކުޅުނު ހަތް މެޗުން ލިބުނު 17 ޕޮއިންޓާއެކު ލީގު ތާވަލުގެ ދެވަނައިގައެވެ. ލީގު ތާވަލުގެ އެއްވަނައިގައި އޮތް ބާސެލޯނާއަށް އެއް މެޗު މަދުން ކުޅެ 18 ޕޮއިންޓް ލިބިފައިވާކަން ފާހަގަކޮށްލެވެއެވެ.