ރާއްޖެ ތަރައްޤީވެފައިވާ ޤައުމަކަށް ހެދުމަށް ބައިނަލްއަޤްވާމީ އެހީތެރިކަން ބޭނުން: ރައީސް މުއިއްޒު

2040 ވަނަ އަހަރާ ހަމައަށް ދާއިރު ރާއްޖެއަކީ ފުރިހަމައަށް ތަރައްޤީވެފައިވާ ޤައުމަކަށް ހެދުމަށް ބައިނަލްއަޤްވާމީ އެހީތެރިކަން ބޭނުންވާ ކަމަށް ރައީސް މުޙައްމަދު މުޢިއްޒު ރޭ އދ. ގެ އާންމު މަޖިލީހުގައި ވިދާޅުވެއްޖެއެވެ.

ރައީސް ވިދާޅުވީ ދިރިއުޅުމުގެ ޙާލަތު ބަދަލުކޮށްލާނެ އިޤްތިޞާދީ ބޮޑު ބަދަލަކަށް ރާއްޖެ އަމާޒު ހިފާފައިވިޔަސް، ދިވެހި ސަރުކާރުން އެކަމަށްޓަކައި ގެންގުޅޭ ސިޔާސަތުތަކުގެ ފުރިހަމަ ނަތީޖާއެއް ނެރެވޭނީ ބައިނަލްއަޤްވާމީ މުޖުތަމަޢުއިން އެކަށީގެންވާ މާލީ އެހީތެރިކަމެއް ލިބިގެން ކަމަށެވެ. އެހެންނަމަވެސް، ޤައުމުގެ ތަރައްޤީގެ ޒިންމާ ރާއްޖެއިން އަބަދުވެސް ނަގަމުން އައީ އަމިއްލައަށް ކަމަށް ރައީސް ފާހަގަކުރެއްވިއެވެ.

ރައީސް ވަނީ ރާއްޖެއަކީ އަބަދު އެހީ ބަލައިގަންނަން އޮތް ޤައުމެއްގެ ގޮތުގައި ނުދެކި، ވިޔަފާރީގެ ބައިވެރިއެއްގެ ގޮތުގައި ދެކުމަށް ބައިނަލްއަޤްވާމީ ބޭންކުތަކާއި އެހީދޭ ފަރާތްތަކަށް ގޮވާލައްވާފައެވެ. އަދި ދަރަނި ނެގުމުގައި އަގު ދަށްކޮށްދިނުމަށާއި، މާލީ ނިޒާމު ފަސޭހަކޮށްދިނުމަށާއި، ޝަރުޠުތައް ލުއިކޮށްދިނުމަށް އެދިވަޑައިގެންނެވިއެވެ.

ރައީސްގެ ތަޤުރީރުގައި ދުނިޔެއަށް ކުރިމަތިވެފައިވާ އިންސާނީ ކާރިސާތަކުގެ ކަންބޮޑުވުންތަކާއި، ތިމާވެށީގެ މައްސަލަތަކާއި، އިޒްރޭލުން ފަލަސްތީނަށް ދެމުންދާ ލާއިންސާނީ ހަމަލާތައް ހުއްޓުވުމާ ގުޅޭގޮތުން ވެސް ވާހަކަފުޅު ދެއްކެވިއެވެ. އަދި ރާއްޖޭގެ އުފެއްދުންތެރިކަން އިތުރުކޮށް، އިޤްތިޞާދު ޑިޖިޓަލައިޒްކޮށް، އާޓިފިޝަލް އިންޓެލިޖެންސްގެ އެހީގައި އިޤްތިޞާދު ބަދަލުކޮށްގެން ތަރައްޤީވެފައިވާ ޤައުމަކަށް ހެދޭނެ ކަމަށް ވިދާޅުވިއެވެ.

ތަޤުރީރު ނިންމަވާލައްވަމުން ރައީސް ވިދާޅުވީ، މިއަދު އަނެއްކާވެސް އދ. އަށް އައިސްފައި މިވަނީ މަތީ އަމާޒަކާ އެކު އާ އުސްމިންތަކަކަށް ވާޞިލުވެ، ކުރިއަށްވުރެ ރަނގަޅު މަސައްކަތްތަކެއް ކުރުމަށް ކަމަށާއި، ރާއްޖެއަކީ 2040 ވަނަ އަހަރު އަންނަންވާ އިރަށް ތަރައްޤީވެފައިވާ ޤައުމަކަށް ހެދުމުގެ ތަޞައްވުރާ އެކު ކަމަށެވެ.