ފުލުހުންގެ ޑޯގް ސްކޮޑު ހަރަކާތްތެރިވަނީ / ފޮޓޯ:ފުލުހުން
ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށް ފުލުހުންގެ ޑޯގް ސްކޮޑުން ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ހަރަކާތްތެރިވާން ފަށައިފި އެވެ.
މި މަސައްކަތަކީ އިމިގްރޭޝަނާ ގުޅިގެން ކުރިއަށްގެންދާ ޚާއްސަ މަސައްކަތެއްކަމަށް ފުލުހުން ބުނެފައިވެއެވެ.
ފުލުހުން ޙިއްސާކޮށްފައިވާ ފޮޓޯތަކުން ދައްކާގޮތުގައި، ޑޯގް ސްކޮޑުގެ ކުއްތާތައް ބޭނުންކޮށްގެން އެއާޕޯޓުގައި ހުރި ލަގެޖާއި ފޮށިގަނޑުތައް ފުލުހުންގެ ޓީމުން ދަނީ ޗެކްކުރަމުންނެވެ. ނަމަވެސް މި މަސައްކަތުގެ އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
ފުލުހުންގެ އޮޕަރޭޝަންތަކުގައި ކުއްތާ ބޭނުންކުރަން ފެށީ 2015 ގައެވެ. މިހާރު ޑޯގް ސްކޮޑުގައި 25 ކުއްތާ ބޭނުންކުރަމުންދާއިރު، 2022 ވަނަ އަހަރު ޓެރަރިޒަމް އޮޕަރޭޝަންތަކަށް ޚާއްސަކޮށް އިތުރު 10 ކުއްތާ ގެނެސްފައިވެއެވެ.
ފުލުހުންގެ ޑޯގް ސްކޮޑު ބޭނުންކުރަނީ އިންޓެލިޖެންސް މަޢުލޫމާތާ ގުޅިގެން ހިންގާ އޮޕަރޭޝަންތަކުގަޔާއި، ކަސްޓަމްސް، އެމްޕީއެލް އަދި އެއާޕޯޓުގެ ކާގޯ އޭރިއާގައެވެ. މީގެ އިތުރުން ރާއްޖެއާއި ރާއްޖެއިން ބޭރުގެ ހައި ޕްރޮފައިލް ބޭފުޅުންގެ އިވެންޓުތަކުގައިވެސް ޑޯގް ސްކޮޑު ބޭނުންކުރެއެވެ.
ކޮމެންޓް