މާލޭގެ މަގުތަކުގެ މައްސަލަތައް ދެނެގަތުމަށް ސާރވޭއެއް ފަށައިފި

މާލެ ސިޓީގެ މަގުތަކުގައި ހުރި މައްސަލަތައް ދެނެގަތުމަށްޓަކައި ޚާއްސަ  ސަރވޭއެއްގެ މަސައްކަތް މާލެ ސިޓީ ކައުންސިލުން ފަށައިފިއެވެ.

މި ސަރވޭ ކުރިއަށް ގެންދަނީ 19 ދާއިރާއަކަށް ބަހާލައިގެންނެވެ.

ސަރވޭގެ މަސައްކަތް ނިމުމުން މަގުތަކުގައި ހުރި މައްސަލަތައް ޑިޖިޓަލްކޮށް ފެންނަން ހުންނާނެއނެއެވެ. މީގެ ތެރޭގައި ހަލާކުވެފައިވާ މަގުތަކާއި، ކާނުތަކާއި، ދުވާރުތަކާއި، އަދި ޢިމާރާތްކުރުމުގެ ގަވާއިދާ ޚިލާފަށް ހުރި ތަންތަނުގެ މަޢުލޫމާތު ހިމެނޭނެއެވެ.

މި މަސައްކަތުގައި މާލޭގެ ކައުންސިލަރުންނާއި ސިޓީ ކައުންސިލްގެ މުވައްޒަފުން ބައިވެރިވާނެއެވެ. ސަރވޭގެ ނަތީޖާ ބޭނުންކޮށްގެން އިސްކަންދޭންޖެހޭ މައްސަލަތައް އަވަހަށް ޙައްލުކުރެވޭނެކަމަށް ކައުންސިލުން ބުނެއެވެ.

މާލޭގެ މަގުތަކުގައި ހުރި އެކިއެކި މައްސަލަތަކާ ގުޅިގެން ޢާންމުންގެ ޝަކުވާ އިތުރުވެފައިވެއެވެ. މި ސަރވޭއިން މަގުތަކުގެ މައްސަލަތަކަށް ދެމެހެއްޓެނިވި ޙައްލެއް ހޯދުމަށް މަގުފަހިވާނެކަމަށް ސިޓީ ކައުންސިލުން ބުނެއެވެ.

މާލޭގެ މަގުތަކުގެ މައްސަލަތަކުގެ ތެރޭގައި މަގުމައްޗަށް ފެންފައިބާ ތަންތަނުގެ މައްސަލަތައްވެސް ހިމެނެއެވެ. ނިމިދިޔަ ހަފްތާގައި އެކަނި 44 ތަނެއް ބަލައި، 11 ތަނެއްގެ މައްސަލަ ޙައްލުކުރެވި، 30 ތަނަކަށް ރަނގަޅުކުރުމަށް ނޯޓިސް ދީފައިވާކަމަށް ސިޓީ ކައުންސިލުން މަޢުލޫމާތު ދެއެވެ.

މާލޭގެ މަގުތަކުގެ މައްސަލަތައް ޙައްލުކުރުމަށް ސަރުކާރުގެ އެކި އިދާރާތައް ގުޅިގެން މަސައްކަތްކުރަމުންދެއެވެ. "މާލެ ފަހި" މަޝްރޫޢުގެ ދަށުން މަގުތަކަށް ދިމާވެފައިވާ ގިނަ މައްސަލަތަކަށް ދާއިމީ ޙައްލު ލިބޭނެކަމަށް ސަރުކާރުން އުންމީދުކުރެއެވެ. މި މަސައްކަތްތަކުގެ ސަބަބުން މާލޭގެ މަގުތަކުގެ މައްސަލަ ހައްލުވެ، ރައްޔިތުންނަށް ލުއިފަސޭހަކަން ލިބިގެންދާނެކަމަށް ބެލެވެއެވެ.