ހުއްދަ ނެތި ހިޖާމާ ޖަހަމުންދިޔަ ފަޒީސް ކްލިނިކް ބަންދުކުރަން އަންގައިފި

ހެލްތު މިނިސްޓްރީގެ ހުއްދަ ނެތި، ރަޖިސްޓްރީ ނުކޮށް ގަވާއިދާ ޚިލާފަށް ހިޖާމާ ޖެހުމުގެ މަސައްކަތް ކުރަމުންދާތީ ފަޒީލާ އުސްމާން ހިންގަމުންދާ 'ފަޒީސް ހިޖާމާ ތެރަޕީ' ކްލިނިކްގެ ޚިދުމަތްތައް ހުއްޓާލަން ފުލުހުން އަންގައިފި އެވެ.

މި މައްސަލަ ހެލްތު މިނިސްޓްރީން ފުލުހަށް ހުށަހެޅީ މިދިޔަ އާދިއްތަ ދުވަހު އެވެ. އެއަށްފަހު ފުލުހުން ވަނީ މައްސަލަ ބަލައި، ކްލިނިކްގެ ވެރިފަރާތަށް ގާނޫނީ ގޮތުން ނަގަންޖެހޭ ހުއްދަތައް ހޯދުމަށާއި، އެ ހުއްދަތައް ލިބެންދެން ޚިދުމަތްތައް ވަގުތީގޮތުން ހުއްޓާލުމަށް ލިޔުމުން އަންގާފައެވެ.

ފުލުހުން ބުނީ މި މައްސަލައާ ގުޅިގެން ކުރިއަށްގެންދާ ތަޙުޤީޤަށް ހިޖާމާ ކްލިނިކްގެ ވެރިފަރާތުން އެއްބާރުލުން ދެމުންދާ ކަމަށެވެ.

މީގެ ކުރިން ވެސް ފަޒީލާގެ ކްލިނިކާ ގުޅޭ މައްސަލަތައް ފެންމަތިވެފައިވެއެވެ. އޭގެ ތެރޭގައި ހަކުރު ބަލީގެ މީހުންނަށް އިންސިއުލިންގެ ބަދަލުގައި ހިޖާމާ ޖެހުމަށް ލަފާދިނުމާއި، ތަން ރަޖިސްޓްރީ ނުކޮށް ހިންގުން ހިމެނެއެވެ.

ފަޒީލާ ބުނެފައިވާ ގޮތުގައި، ކޮންމެ ސެޝަނަކަށް 1,000 ރުފިޔާގެ މަގުން ދުވާލަކު 30,000 ރުފިޔާގެ އާމްދަނީއެއް ލިބޭ ކަމަށާއި، މަހެއްގެ މައްޗަށް 800,000 ރުފިޔާ ލިބޭ ކަމަށް އޭނާ ބުނެފައިވެއެވެ.