ޕާޓީން ވަކިވުމަށް އެދޭ މެންބަރުންނަށް އީސީން ލުއިފަސޭހަކޮށްދީފި

ސިޔާސީ ޕާޓީން ވަކިވުމަށް އެދި އިލެކްޝަންސް ކޮމިޝަނަށް (އީސީ) ހުށަހެޅޭނެ ގޮތްތައް މިއަދު ފަސޭހަކޮށްދީފި އެވެ.

އީސީން ސިޔާސީ ޕާޓީތަކުގެ ގަވައިދަށް ގެނައި ނުވަ ވަނަ އިސްލާހުގައި ބުނެފައިވަނީ ޕާޓީން މެމްބަރަކު ވަކިވުމަށް އެދޭތާ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެ ކަމަށެވެ. އަދި އެ މުއްދަތުގެ ތެރޭގައި އެކަން ނުކޮށްދީފިނަމަ، އީސީން ކަނޑައަޅާ ނިޒާމުގެ ތެރެއިން ޝަކުވާ ހުށަހެޅުމުން އޭނާގެ ނަން، ޕާޓީގެ ދަފްތަރުން އުނިކޮށްދޭން ޖެހޭނެ ކަމަށް ވެސް ބުނެފައިވެ އެވެ.

މީގެ ކުރިން ގަވައިދަވައިދު އޮތް ގޮތުން، ޕާޓީން ވަކިކޮށްދިނުމަށް އީސީއަށް ހުށަހަޅަންޖެހެނީ ވަކި ހާއްސަ ފޯމަކުންނެވެ. ނަމަވެސް މިހާރު މި ގެނެވުނު ބަދަލާ އެކު، މެންބަރުންނަށް ޕާޓީން ވަކިވުމަށް އެދުމުގެ މަގު ތަނަވަސްވެގެން ދާނެ އެވެ.

މީގެ އިތުރުން، ސިޔާސީ ޕާޓީތަކުގެ ގަވައިދަށް ގެނެވުނު އަނެއް މުހިންމު އިސްލާހަކީ، ކުރިން ހުރި ޕާޓީއަށް ނޭނގި އެހެން ޕާޓީއަކަށް ބަދަލުކޮށްފައިވާ މެންބަރުންނާ ގުޅޭ ގޮތުންނެވެ. މި އިސްލާހުގެ ދަށުން، ކުރީގައި ހުރި ޕާޓީއަށް ބަދަލުވުމަށް އީސީން ކަނޑައަޅާ ނިޒާމުގެ ތެރެއިން ހުށަހެޅުމުން، ނޭނގި ރަޖިސްޓްރީކޮށްފައި އޮތް ޕާޓީން ވަގުތުން ވަކިކޮށް، ކުރިން ހުރި ޕާޓީއަށް އީސީން އަލުން ވައްދައިދޭން ޖެހޭނެ އެވެ.

ނޭނގި ސިޔާސީ ޕާޓީތަކަށް ވެއްދުމުގެ މައްސަލަތައް އިތުރުވަމުން ދިއުމާ ގުޅިގެން، މި ފަހުން ވަނީ އެފަދަ  މައްސަލައެއްގައި ފުރަތަމަ ފަހަރަށް ދައުވާ ވެސް ކޮށްފައެވެ. މި ބަދަލުތަކާ އެކު، ސިޔާސީ ޕާޓީތަކުގެ މެންބަރުންގެ ޙައްޤުތައް އިތުރަށް ހިމާޔަތްކުރެވި، ޕާޓީތަކުގެ މެންބަރޝިޕް ބެލެހެއްޓުމުގައި އިތުރު ހަރުދަނާކަމެއް ގެނެވޭނެ ކަމަށް އީސީން އުންމީދު ކުރެ އެވެ.