މަސް ޕްރޮސެސްކުރާ ތިން ކާރުޚާނާ މިއަހަރު ތަރައްޤީކުރަން ފަށަނީ

ރާއްޖޭގައި މަސް ޕްރޮސެސްކުރާ ތިން ކާރުޚާނާއެއް ތަރައްޤީކުރުމުގެ މަސައްކަތް މިއަހަރު ފެށޭނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު  މިފަދައިން ވިދާޅުވީ މަސްދޯނިތަކުގައި ލޮނުފެނުން މަސް ފިނިކުރާ ނިޒާމް ޤާއިމްކުރުމަށް ލޯނު ދޫކުރުމުގެ މަޝްރޫޢު އަލުން ފެށުމުގެ ރަސްމިއްޔާތުގައެވެ.

ވަޒީރު ޝިޔާމް ވިދާޅުވިގޮތުގައި މަސްވެރިކަމުގެ ސިނާޢަތަށް ދިމާވެފައިވާ އެންމެ ބޮޑު އެއް ގޮންޖެހުމަކީ ބާނާ މަސް ރޯމަހުގެ ގޮތުގައި އެކްސްޕޯޓްކުރަން ޖެހުމެވެ. މިކަމުގެ ސަބަބުން މަހަށް ލިބެންވާ ހަމަ އަގު ނުލިބޭކަމަށް ވަޒީރު ފާހަގަކުރެއްވިއެވެ. މި މައްސަލަ ހައްލުކުރުމަށްޓަކައި، މަހަށް ހަމައަގު ހޯދައިދިނުމަށާއި އަގު އިތުރުކޮށްގެން މަސް ބޭރުކުރުމަށް ޚާއްޞަ އިސްކަމެއް ދެއްވައިގެން މަސައްކަތްތަކެއް ކުރައްވަމުން ގެންދަވާކަމަށް ވަޒީރު ވިދާޅުވިއެވެ.

މިހާރު ރާއްޖޭގައި ޕްރޮސެސްކުރެވެނީ ދުވާލަކު ގާތްގަނޑަކަށް 110 މެޓްރިކް ޓަނުގެ މަސްކަމަށް ވަޒީރު ވިދާޅުވިއެވެ. ނަމަވެސް އަލަށް ތަރައްޤީކުރާ ކާރުޚާނާތަކާއެކު މި ޢަދަދު ގާތްގަނޑަކަށް 300 މެޓްރިކް ޓަނަށް އިތުރުވެގެންދާނެކަމަށް ވަޒީރު ޝިޔާމް ވިދާޅުވިއެވެ. މީގެ ނަތީޖާއެއްގެ ގޮތުން، މިހާރު ރޯމަހުގެ ގޮތުގައި ބޭރުކުރާ މަހުގެ ބޮޑު އިންސައްތައެއް އަގު އިތުރުކުރެވިގެން ބޭރުކުރެވޭނެކަމަށް ވަޒީރު ފާހަގަކުރެއްވިއެވެ.

ވަޒީރު ޝިޔާމް ދެއްވި މަޢުލޫމާތުގައި، މިހާރު ރަނގަޅު މަސްވެރިކަމެއްގައި މަސް އެކްސްޕޯޓްކޮށްގެން 92 މިލިޔަން ޑޮލަރާއި 95 މިލިޔަން ޑޮލަރާ ދެމެދުގެ އަދަދެއް ރާއްޖެއަށް ލިބޭކަމަށް ވިދާޅުވިއެވެ. އެހެންނަމަވެސް އައު ކާރުޚާނާތަކާއެކު މި އަދަދު ދެގުނަ ކުރެވޭނެކަމަށް ވަޒީރު އުންމީދުކުރައްވާކަމަށް ވިދާޅުވިއެވެ. މީގެ އިތުރުން، ޚާއްޞަކޮށް ކަނޑުބިލަމަހުން ލިބޭ އާމްދަނީ ބޮޑަށް އިތުރުވެގެންދާނެކަމަށްވެސް ވަޒީރު ޝިޔާމް ފާހަގަކުރެއްވިއެވެ.