އިޤްތިޞާދު ސިންދަފާތުކުރުމަށް ބައިނަލްއަޤްވާމީ އެހީތެރިކަން ބޭނުން: ރައީސް މުއިއްޒު

އިޤްތިޞާދު ސިންދަފާތުކޮށް، ޑިޖިޓަލައިޒްކުރުމަށް ކުދި ޖަޒީރާ ޤައުމުތަކުން ކުރާ މަސައްކަތުގައި ބައިނަލްއަޤްވާމީ މުޖްތަމަޢުގެ އެހީތެރިކަން ބޭނުންވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އދ.ގައި ކުރިއަށްދާ ސަމިޓް އޮފް ދަ ފިއުޗަރގެ ތެރެއިން ބޭއްވުނު ސިޑްސްގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، އުފެއްދުންތެރިކަން އިތުރުކުރުމަކީ ކުދި ޖަޒީރާ ޤައުމުތަކުގެ އިޤްތިޞާދީ ކުރިއެރުމާއި ދެމެހެއްޓެނިވި ތަރައްޤީއަށް ކޮންމެހެން ކުރަންޖެހޭ ކަމެއް ކަމަށެވެ.

ރައީސް އިތުރަށް ވިދާޅުވީ، ރާއްޖެ މިހާރު ތަރައްޤީވަމުން އަންނަ ޤައުމުތަކުގެ ލިސްޓުގައި ހިމެނުމާއެކު، އެހެން ކުދި ޖަޒީރާ ޤައުމުތަކެކޭ އެއްފަދައިން ބައެއް ދަތިތަކާ ކުރިމަތިލާންޖެހޭ ކަމަށެވެ. މި ދަތިތަކުން އަރައިގަތުމަށް އިޤްތިޞާދު ސިންދަފާތުކޮށް، އުފެއްދުންތެރިކަން އިތުރުކުރަން ޖެހޭކަމަށް ރައީސް ފާހަގަކުރެއްވިއެވެ.

ރައީސް މުއިއްޒު ވަނީ އިޤްތިޞާދު ޑިޖިޓަލައިޒްކުރުމުގެ މުހިންމުކަމަށްވެސް އަލިއަޅުވާލައްވާފައެވެ. އަދި ޒުވާނުންނަށް ޑިޖިޓަލް ހުނަރުތައް ދަސްކޮށްދިނުމުން ގްލޯބަލް ކްރިއޭޓިވް އިކޮނޮމީގައި ބައިވެރިވުމުގެ ފުރުޞަތު ލިބިގެންދާނެ ކަމަށް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ އިޤްތިޞާދީގޮތުން ކުރިއަރައި، ދެމެހެއްޓެނިވި ތަރައްޤީއަށް ރާއްޖެއިން ކުރާ މަސައްކަތަށް ބައިނަލްއަޤްވާމީ ޕާޓްނަރުންގެ އެހީތެރިކަން ބޭނުންވާކަމަށެވެ. އަދި އދ އާއި އެހެނިހެން ބައިނަލްއަޤްވާމީ ފަރާތްތަކުން މިކަމުގައި ބައިވެރިވެ، އެހީތެރިވެދެވޭނެ ގޮތްތައް ހޯދަންޖެހޭކަމަށް ވިދާޅުވިއެވެ. މީގެ އިތުރުން، ޑިޖިޓަލް އިންފްރާސްޓްރަކްޗަރ ބިނާކުރުމަށާއި އެކަމާ ގުޅޭ މުއައްސަސާތައް ހަރުދަނާކުރުމުގައިވެސް އެހީތެރިކަން ފޯރުކޮށްދިނުމަށް ރައީސުލްޖުމްހޫރިއްޔާ ގޮވާލެއްވިއެވެ.