"ފަޒީސް ހިޖާމާ ތެރަޕީ" ބަންދުކުރުމަށް ފުލުހުންގެ އެހީ ހޯދަނީ

ފަޒީސް ހިޖާމާ ތެރަޕީ

ހުޅުމާލޭގައި ހިންގަމުންދާ "ފަޒީސް ހިޖާމާ ތެރަޕީ" އިން ހެލްތު މިނިސްޓްރީގެ ހުއްދަ ނެތި ހިޖާމާގެ ފަރުވާ ދެމުންދާތީ، އެ ތަން ބަންދުކުރުމަށް ފުލުހުންގެ އެހީތެރިކަމަށް ހެލްތު މިނިސްޓްރީން އެދިފައިވާ ކަމަށް ފުލުހުން މިއަދު ހާމަކޮށްފިއެވެ.

މި މައްސަލަ މިހާރު ފުލުހުން ތަޙުޤީޤު ކުރަމުންދާ ކަމަށްވެސް ބުނެފައިވެއެވެ.

ރާއްޖޭގައި އެންމެ ފުޅާ ދާއިރާއެއްގައި ހިޖާމާގެ ފަރުވާ ދެމުންދާ ތަންތަނުގެ ތެރޭގައި ހިމެނޭ މި ކްލިނިކް ހިންގަނީ ފަޒީލާ އުސްމާން (ފަޒީ) އެވެ. ހެލްތު މިނިސްޓްރީން ބުނާ ގޮތުގައި، ފަޒީއާ ބައްދަލުކޮށް ޤާނޫނީ ގޮތުން ރަޖިސްޓަރީކޮށްގެން ހިދުމަތް ދިނުމަށް އެންގުމަށްފަހުވެސް، އެކަމަށް އިޖާބަ ނުދިނުމުން ވަނީ ފިޔަވަޅު އަޅަން ނިންމާފައެވެ.

މިނިސްޓްރީން އިތުރަށް ފާހަގަކޮށްފައިވަނީ، ސޯޝަލް މީޑިއާގައި ކުރަމުންދާ އިޝްތިހާރުތަކަކީވެސް މިނިސްޓްރީގެ ހުއްދަ ބޭނުންވާ ކަމެއްކަމާއި، ބަލިމީހުންގެ މެޑިކަލް ރިޕޯޓުތައް ޢާންމުކޮށް ހާމަކުރުމަކީ ރައްކާތެރި ކަމެއް ނޫންކަމެވެ. އެހެންކަމުން މި ކަންކަން ހުއްޓާލުމަށްވެސް ވަނީ އަންގާފައެވެ.

ހެލްތު ޕްރޮފެޝަނަލުންގެ ޤާނޫނުގެ ދަށުން، ލައިސަންސް ނެތި ޞިއްޙީ ޚިދުމަތް ދޭ ފަރާތްތަކަށް 75,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރެވޭނެއެވެ. އަދި މިފަދަ ތަންތަން ބަންދުކުރުމުގެ ބާރުވެސް މިނިސްޓްރީއަށް ލިބިގެންވެއެވެ.

2019 ވަނަ އަހަރުވެސް "ފަޒީސް ހިޖާމާ ތެރަޕީ" ބަންދުކުރުމަށް ހެލްތު މިނިސްޓްރީން އަމުރުކޮށްފައިވާކަންވެސް ފާހަގަކޮށްލެވެއެވެ.

ފުލުހުން ސިއްޙަތު