މަތީތައުލީމަކީ އިތުބާރު ހިފޭ ތައުލީމަކަށް ހަދަންޖެހޭ
މަތީ ތަޢުލީމް ދޭ މަރުކަޒުތަކުން ހިންގާ ކޯސްތަކުގެ ހުރިހާ އިމްތިހާނުތަކުން %50 އިންސައްތަ ފާސްވާންޖެހޭގޮތަށް އެކްރެޑިޓޭޝަން އުޞޫލަށް ބަދަލު ގެނައުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ނިންމައިފިއެވެ.
އެމްކިއުއޭގެ ސީއީއޯ ފިޒާނާ ރަޝީދު ޕީއެސްއެމް ނިއުސްއަށް ދެއްވި އިންޓަވިއުއެއްގައި ވިދާޅުވި ގޮތުގައި، މި ބަދަލު ގެނައުމުގެ މައިގަނޑު މަޤްޞަދަކީ ކޯސްތަކުގައި ދަރިވަރުންނަށް ހަވާލުކުރާ އެސައިމަންޓްތައް އެހެން މީހުން ލައްވާ ތައްޔާރުކުރުމުގެ މައްސަލައަށް ހައްލެއް ހޯދުމެެވެ. މި ބަދަލާއެކު، ދަރިވަރުން ކޯހުން ފާސްވުމަށް އިމްތިހާނުތަކުން 50% އިންސައްތަ ހޯދަންޖެހޭނެއެވެ.
" 50% އިންސައްތަ ކޮންޓްރޯލް އެގްޒާމުން ފާސްވެގެން ނޫނިއްޔާ ފާސްނުވާގޮތަށް ހަދައިފިނަމަ އެސައިމަންޓްގެބައި ކުޑަވެގެންދާނެކަމަށް ޤަބޫލުކުރެވޭ. އެސައިމަންޓް ގަތުމުގެ ބައިވެސް ކުޑަވެގެންދާނެ." ފިޒާނާ ރަޝީދު ވިދާޅުވިއެވެ.
މިހާރު ބައެއް މަތީ ތަޢުލީމުގެ މަރުކަޒުތަކުން އެސައިމަންޓްތަކަށް %40 އިން %70 އާ ދެމެދުގެ މާކްސް ދޭއިރު، ބައެއް މާއްދާތަކުގައި %100 އެސައިމަންޓުން ފާސްވުމުގެ ފުރުޞަތު ދަރިވަރުންނަށް ލިބެއެވެ. މިކަމުގެ ސަބަބުން އެހެން މީހުން ލައްވާ އެސައިމަންޓް ހަދައިގެން ސަނަދު ހޯދުމުގެ ފުރުޞަތު ބޮޑުވެފައިވާކަމަށް އެމްކިއުއޭއިން ފާހަގަކުރެއެވެ.
ފިޒާނާ ރަޝީދު އިތުރަށް ވިދާޅުވި ގޮތުގައި، މި އައު އުޞޫލު ވަރަށް އަވަހަށް ގެޒެޓްކުރެވޭނެއެވެ. އަދި މި ބަދަލު ގެނައުމަށް ނިންމާފައިވަނީ މަތީ ތަޢުލީމްދޭ މަރުކަޒުތަކުގެ އިސްވެރިންނާ މަޝްވަރާކުރުމަށްފަހުގައި ކަމަށްވެސް އޭނާ ފާހަގަކުރެއްވިއެވެ.
މި ބަދަލާއެކު، ރާއްޖޭގެ މަތީ ތަޢުލީމުގެ ފެންވަރު މަތިވެ، ދަރިވަރުންގެ އަމިއްލަ މަސައްކަތުގެ އަގު ވަޒަންކުރެވޭނެކަމަށް އުންމީދުކުރެވެއެވެ. އަދި މީގެ ސަބަބުން ރާއްޖޭގެ މަތީ ތަޢުލީމުގެ ސަނަދުތަކުގެ އަގު އިތުރަށް މަތިވެގެންދާނެކަމަށްވެސް ބެލެވެއެވެ.
ކޮމެންޓް