ކުއްލި މަޤުބޫލުކަމެއް ހޯއްދެވި އަނޫރާ ސްރީލަންކާގެ ރިޔާސީ އިންތިޚާބުގައި ކާމިޔާބު ކުރުމާގާތަށް

ސްރީލަންކާގައި ސިޔާސީ ގޮތުން ކުއްލި މަޤްބޫލުކަމެއް ހޯއްދެވި އަނޫރާ ކުމާރަ ޑިސެނަޔަކަ އެ ޤައުމުގައި އިއްޔެ ބޭއްވި  ރިޔާސީ އިންތިހާބުގައި އެޤައުމުގެ ސިޔާސީ ބޮޑުންނާއި ވާދަކުރައްވާ އިންތިހާބު ކާމިޔާބު ކުރެއްވުމާއި ގާތަށް ޖެހިލައިފިއެވެ.

އިއްޔެ ލަންކާގައި ބޭއްވުނު މި އިންތިޚާބުގައި ޖުމްލަ 38 ކެންޑިޑޭޓުން ވާދަކުރެއްވިއެވެ.

ސްރީލަންކާގެ ވޯޓުލުމުގެ ނިޒާމުގައި، ކޮންމެ ވޯޓުލާ މީހަކަށްވެސް އެންމެ ރަނގަޅު ތިން ކެންޑިޑޭޓެއްގެ ނަމުގައި ފާހަގަޖެހުމުގެ ފުރުޞަތު ލިބިގެންވެއެވެ. އިންތިޚާބު ކާމިޔާބުވި ކަމަށް ބަލާނީ 50 ޕަސެންޓް ނުވަތަ އެއަށްވުރެ ގިނަ ވޯޓު ލިބުމުންނެވެ. ފުރަތަމަ ބުރުގައި އެއްވެސް ކެންޑިޑޭޓަކަށް 50 ޕަސެންޓް ނުލިބިއްޖެ ނަމަ، ދެން އޮންނާނީ އެންމެ ތާއީދު ބޮޑު ދެ ކެންޑިޑޭޓުންގެ މެދުގައި ވޯޓު ލުމެވެ.

ލަންކާގެ އިލެކްޝަން ކޮމިޝަނުން ބުނި ގޮތުގައި މިއީ އެ ގައުމުގެ ތާރީޚުގައި ބޭއްވުނު އެންމެ ސުލްހަވެރި އިންތިޚާބެވެ. މިކަމަކީ ގައުމުގެ ޑިމޮކްރަސީ ހަރުދަނާވަމުން އަންނަކަމުގެ ހެއްކެއް ކަމުގައި ބެލެވެއެވެ.

ވޯޓު ލުމުގެ ހައްގު ލިބިގެންވާ 17.1 މިލިއަން މީހުންގެ ތެރެއިން 76 ޕަސެންޓް މީހުން ވޯޓު ލާފައި ވާއިރު، މިހާތަނަށް ގުނި ޕޯސްޓަލް ވޯޓުގެ 58 ޕަސެންޓް އަނޫރާ އަށް ވަނީ ލިބިވަޑައިގެންފައެވެ. މިހާތަނަށް ސާފުކުރި ހުރިހާ ވޯޓެއްގެ ޖުމްލައަށް ބަލާއިރު، އަނޫރާ އޮތީ 53 ޕަސެންޓަށްވުރެ މަތީގައެވެ. މިއީ ފުރަތަމަ ބުރުގައި އިންތިޚާބު ކާމިޔާބުކުރެއްވުމަށް އެކަށީގެންވާ އަދަދެކެވެ.

އަނޫރާގެ ކާމިޔާބީއާއެކު، ސްރީލަންކާގެ ސިޔާސީ މަޝްރަހުގައި އައު ބަދަލުތަކެއް އަންނާނެކަމަށް ބެލެވެއެވެ. އޭނާގެ ވައުދުތަކުގެ ތެރޭގައި ކޮރަޕްޝަނާ ދެކޮޅަށް މަސައްކަތްކުރުމާއި، ފަގީރުންގެ ދިރިއުޅުމުގެ ފެންވަރު ރަނގަޅުކުރުން ހިމެނެއެވެ. މި އިންތިޚާބުގެ ސުލްހަވެރިކަމާއި އަނޫރާގެ ކާމިޔާބީއާއެކު، ގައުމުގެ އިގްތިޞާދީ އަދި އިޖްތިމާޢީ ހާލަތު ރަނގަޅުވެގެންދާނެކަމަށް ގިނަ ބަޔަކު އުންމީދުކުރެއެވެ.