ބައިނަލްއަޤްވާމީ މައިދާނުގައި ދިވެހީންގެ އަޑު އިއްވުމުގެ މުހިންމުކަން ރައީސް ފާހަގަކުރައްވައިފި

ރާއްޖެއަށް ބޭނުންވާ ތަރައްޤީގެ މަގު ކޮށޭނީ ބައިނަލްއަޤްވާމީ މައިދާންތަކުގައި ދިވެހީންގެ އަޑު އިއްވައިގެން ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ އދ.ގެ މެމްބަރު ޤައުމަކަށް ރާއްޖެ ވިތާ 59 އަހަރު ފުރުމާ ގުޅިގެން އަދ.ގެ މައި މަރުކަޒުގެ ބޭރުގައި ހުންނަވާ ދެއްވި ޚާއްސަ ޚިޠާބެއްގައެވެ.

ރައީސް ވިދާޅުވީ އދ.ގެ ބަހުސްތަކުގައި ބައިވެރިވުމަކީ ރާއްޖެއަށް ވެސް މުހިންމު ކަމެއް ކަމަށެވެ. އަދި ބައިނަލްއަޤްވާމީ މައިދާނުގައި ބަސް އިއްވައި، ބަސް ވިކެން ވެސް ޖެހޭނެކަމަށް ވިދާޅުވިއެވެ. ރާއްޖެއަށް ބޭނުންވާ ތަރައްޤީއަށް މަގު ކޮށޭނީ ވެސް ރާއްޖެއަށް ދުނިޔޭގެ އިޙްތިރާމް ލިބިގެންކަމަށާއި އެ ކަން ކުރުމަށް މި ފަދަ މައިދާންތަކުގައި އަޑުއުފުލުން މުހިންމު ކަމަށް ރައީސް ފާހަގަކުރެއްވިއެވެ.

އދ.އާ ރާއްޖެ ގުޅުނު މައިގަނޑު ސަބަބަކީ ހަމައެކަނި އެ ޤައުމެއްގެ ރައްޔިތުން ޤައުމުގެ މިނިވަންކަން ބަލައިގަތް ނަމަވެސް މިނިވަންކަން ދިފާޢު ނުކުރެވޭނެތީ ކަމަށް ރައީސް ވިދާޅުވިއެވެ. މިނިވަންކަން ބައިނަލްއަޤްވާމީ މަސްރަޙުގައި ދިފާޢުކޮށް ކުރިއެރުވޭނީ އެ މިނިވަންކަން ލިބިއްޖެކަން އެހެން ޤައުމުތަކަށް ވެސް އަންގައިގެން ކަމަށް ވާތީކަމަށް އެ މަނިކުފާނު ވިދާޅުވިއެވެ.

ރައީސް ވިދާޅުވީ ރާއްޖޭގެ މިނިވަންކަން ދިފާޢުކުރުމުގައި ކުރާ މަސައްކަތުގެ އެންމެ މުހިންމު އެއް މަސައްކަތް ހިނގަނީ އދ. ގައި ކަމަށެވެ. އަދި އދ.ގެ މެމްބަރުކަން މުހިންމުވާ ސަބަބަކީ ވެސް އެއީ ކަމަށް ވިދާޅުވިއެވެ.

ރައީސް ވިދާޅުވީ ފާއިތުވި 59 އަހަރު ދިވެހި ޑިޕްލޮމެޓުން އދ.ގައި ކުރިއެރުވީ ރާއްޖޭގެ މަޞްލަޙަތުކަމަށެވެ. އަދި އާ ސަރުކާރުން ވެރިކަމާ ޙަވާލުވެ ފާއިތުވި 10 މަސް ތެރޭ ވެސް "އިތުރު ބާރު މިނެއްގައި" ކުރަމުން އަންނަނީ އެ މަސައްކަތް ކަމަށް ވިދާޅުވިއެވެ.

ރައީސް ވިދާޅުވީ އެ މަނިކުފާނުގެ ޚާރިޖީ ސިޔާސަތުގައި ދިވެހީންގެ މިނިވަންކަމާއި ސަލާމަތާއި ރައްކާތެރިކަމަށް އިސްކަންދެއްވާނެ ކަމަށެވެ. އަދި "ޕްރޯ މޯލްޑިވްސް" ސިޔާސަތު ވެސް ކުރިއަރުވާނެ ކަމަށް ވިދާޅުވިއެވެ.