ކުދި ޖަޒީރާ ޤައުމުތަކުގެ ދަރަނީގެ މައްސަލައަށް ޙައްލެއް ބޭނުން: ރައީސް މުއިއްޒު

ކުދި ޖަޒީރާ ޤައުމުތަކުގެ ދަރަނީގެ މައްސަލައަށް ދެމެހެއްޓެނިވި ޙައްލެއް ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

އެމަނިކުފާނު މިފަދައިން ގޮވާލައްވާފައި ވަނީ އދ.ގެ 79 ވަނަ އާންމު މަޖިލީހުގައި ބައިވެރިވެވަޑައިގަތުމަށް ނިއުޔޯކަށް ވަޑައިގެން، "ސަމިޓް އޮފް ދަ ފިއުޗަރ" ގެ ހަވާސާގައި ބޭއްވުނު ސިޑްސްގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

ރާއްޖެއާއި އެންޓީގާ އެންޑް ބާބިއުޑާއިން ކޯ-ހޯސްޓްކުރި މި ބައްދަލުވުމުގައި ރައީސް މުއިއްޒު ވިދާޅުވީ، ކުދި ޖަޒީރާ ޤައުމުތަކުގެ އިޤްތިޞާދު ސިންދަފާތުކުރުމަށާއި، މާލީ ބުރަތައް ލުއިކޮށްދިނުމަށް މަސައްކަތްކުރަން ޖެހޭކަމަށެވެ. އަދި މި ޤައުމުތަކަކީ މާލީގޮތުން ފުދުންތެރި، އިޤްތިޞާދީގޮތުން ކުރިއަރާފައިވާ އަދި ވިލުންތެރި ޤައުމުތަކަކަށް ހެދުމުގެ މުހިންމުކަން ފާހަގަކުރެއްވިއެވެ.

މިއީ ރައީސް މުއިއްޒު އދ.ގެ އާންމު މަޖިލީހުގައި ބައިވެރިވެވަޑައިގަންނަވާ ފުރަތަމަ ފަހަރެވެ. އެމަނިކުފާނުގެ މި ދަތުރުފުޅުގައި "ސަމިޓް އޮފް ދަ ފިއުޗަރ" ގެ މުހިންމު މަޝްވަރާތަކުގެ ރިޔާސަތު ބެލެހެއްޓެވުމުގެ އިތުރުން، އެކި ދައައުލަތްތަކާއި ޤައުމުތަކުގެ އިސްވެރިންނާ ބައްދަލުކުރައްވާ ބައިލެޓްރަލް އަދި މަލްޓިލެޓްރަލް މަޝްވަރާތައް ކުރިއަށްގެންދެވުމަށްވެސް ވަނީ ހަމަޖެހިފައެވެ.

މިދަތުރުފުޅުގެ ތެރެއިން ރައީސުލްޖުމްހޫރިއްޔާ އދ.ގެ ސެކިއުރިޓީ ކައުންސިލްގައި ހުޅުވާލާފައިވާ ބަހުޘްގައި މި މަހުގެ 24 ވަނަ ދުވަހު ތަޤުރީރުކުރައްވާނެއެވެ. މިއީ ރާއްޖޭގެ ރައީސަކު އދ.ގެ ސެކިއުރިޓީ ކައުންސިލްގައި ތަޤުރީރުކުރައްވާ ފުރަތަމަ ފަހަރެވެ.

ރައީސް މުއިއްޒުގެ މި ދަތުރުފުޅަކީ ކުދި ޖަޒީރާ ޤައުމުތަކުގެ ކަންބޮޑުވުންތައް ބައިނަލްއަޤްވާމީ މުޖުތަމަޢުގެ ސަމާލުކަމަށް ގެނައުމަށާއި، ރާއްޖޭގެ ހައިސިއްޔަތު އިތުރަށް ރަނގަޅުކުރުމަށް މުހިންމު ދައުރެއް އަދާކުރާނެ ދަތުރުފުޅެއް ކަމަށް ބެލެވެއެވެ.