ކޮންމެ އަހަރަކު 100 އިމާމުން ރާއްޖޭން ބޭރުން ތަމްރީނު ކުރަނީ

ރާއްޖޭގައި އިސްލާމީކަންތައް ކުރިއެރުވުމަށް ކުރަމުން އަންނަ މަސައްކަތުގެ ތެރެއިން ކޮންމެ އަހަރަކު 100 އިމާމުން ރާއްޖޭން ބޭރުން ތަމްރީނަށް ފޮނުވުމަށް މަސައްކަތް ކުރައްވަމުން ގެންދަވާ ކަމަށް އިސްލާމިކް މިނިސްޓަރު، ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ، މިއަދު ފެށި އިމާމުންގެ މަހާސިންތާ ފެށުމަށް ބޭއްވި ރަސްމިއްޔާތުގައި މަހާސިންތާގެ ބައިވެރިންނާއި ވާހަކަދައްކަވަމުންނެވެ.

އެގޮތުން މިނިސްޓަރ ވިދާޅުވީ، މި ސަރުކާރުން މިހާތަނަށް 400 އަށްވުރެ ގިނަ އިމާމުން ތާޒާކޮށްފައިވާއިރު، މިހާރު ވެސް ރާއްޖޭގެ 60 އިމާމުން ރާއްޖޭން ބޭރުގައި ތަމްރީނު ހަދަމުން އަންނަ ކަމަށެވެ.

މިސަރުކާރުގެ އަމާޒަކީ ކުރިއަށް އޮތް ފަސް އަހަރުގެ ތެރޭގައި 500 އިމާމުން ތަމްރީނުކޮށް އަދި މަދުވެގެން 1000 ހަތީބުން ތަމްރީންކޮށް ނެރުން ކަމަށް މިނިސްޓަރ ވިދާޅުވިއެވެ.

"އަޅުގަނޑުމެންގެ އަމާޒަކީ މިއަހަރު ނިމުމުގެ ކުރިން ރާއްޖޭން ބޭރަށް 100 އިމާމުން ފޮނުވައިގެން ތަމްރީންކުރުން. ﷲ އިރާދަކުރެއްވިއްޔާ މި ފަސް އަހަރުގެ ތެރޭގައި ރާއްޖޭން ބޭރަށް ކޮންމެ އަހަަރަކު 100 އިމާމުން އަޅުގަނޑުމެން ފޮނުވާނަން. އެހެންވީމަ މި ފަސް އަހަރު ތެރޭގައި މަދުވެގެން 500 އިމާމުން ތަމްރީންކުރާނަން އަޅުގަނޑުމެން. އަދި މަދުވެގެން 1000 ހަތީބުން ނެރޭނަން،" މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ރާއްޖޭން ބޭރުގައި ތިބި 60 އިމާމުން ރާއްޖޭން ބޭރަށް ދާން ޓިކެޓް ނަގާފައިވަނީ އަމިއްލައަށް ކަމަށް ބުނެ، ސަރުކާރާއި މެދު ރައްޔިތުން ދެކޭގޮތް ބަދަލު ކުރުމަށް ވާހަކަތަކެއް ދައްކާނެ ކަމަށެވެ. ނަމަވެސް މިހާރު ރާއްޖޭގެ އިގްތިސޯދީ ހާލަތުން އަރައިގަނެ، އަންނަ އަހަރުން ފެށިގެން ރާއްޖޭން ބޭރަށްދާ އިމާމުންގެ ހުރިހާ ހަރަދެއް ކުރެވޭތޯ މަސައްކަތް ކުރައްވާނެ ކަމަށް ވެސް މިނިސްޓަރ ވިދާޅުވިއެވެ.