އިހަވަންދޫގައި ޑޮކްޔާޑަކާއި ސްލިޕްވޭއެއް ގާއިމުކޮށް އުތުރުގެ މެރިޓައިމް ޚިދުމަތްތައް ފުޅާކުރަނީ

އެއްބަސްވުމުގައި ސޮއިކުރުމުގެ ތެރެއިން / ފޮޓޯ:އެމްޕީއެލް

ހއ. އިހަވަންދޫގައި ޑޮކްޔާޑަކާއި ސްލިޕްވޭއެއް ގާއިމުކުރުމަށް އެމްޕީއެލްއާއި އިހަވަންދޫ ކައުންސިލާ ދެމެދު އެއްބަސްވުމެއްގައި ސޮއިކޮށްފިއެވެ.

މިއަދު އިހަވަންދޫގައި ބޭއްވުނު ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ އެމްޕީއެލްގެ ސީއީއޯ މުހައްމަދު ވަޖީހް އިބްރާހިމްއާއި އިހަވަންދޫ ކައުންސިލްގެ ރައީސް އަހްމަދު ސޮބާހެވެ.

މި ރަސްމިއްޔާތުގައި ވާހަކަފުޅު ދައްކަވަމުން ސީއީއޯ ވަޖީހް ވިދާޅުވީ، އިހަވަންދޫގައި ގާއިމުކުރާ ޑޮކްޔާޑާއި ސްލިޕްވޭއަކީ އުތުރުގައި ފޯރުކޮށްދޭން ފަށާފައިވާ މެރިޓައިމް ޚިދުމަތްތަކުގެ މުހިންމު ބައެއްކަމަށެވެ. އަދި މި މަޝްރޫޢުގެ އަމަލީ މަސައްކަތް ވީހާވެސް އަވަހަކަށް ފެށުމަކީ އެމްޕީއެލްގެ އަމާޒު ކަމުގައި އޭނާ ފާހަގަކުރެއްވިއެވެ.

އިހަވަންދޫ ކައުންސިލްގެ ރައީސް ސޮބާހް ވިދާޅުވީ، މި މަޝްރޫޢަކީ އިހަވަންދޫއަށް ވަރަށް ބޮޑު ކުރިއެރުމެއް ގެނެސްދޭނެ ކަމެއް ކަމަށާއި، މީގެ ސަބަބުން ރަށުގައި ގިނަ ވަޒީފާގެ ފުރުސަތުތަކެއް އުފެދިގެންދާނެ ކަމަށެވެ.

މި މަޝްރޫޢަކީ އެމްޕީއެލްއިން އުތުރުގައި ފޯރުކޯރުކޮށްދޭ މެރިޓައިމް ޚިދުމަތްތަކުގެ ތެރެއިން އެއް މަޝްރޫޢެވެ. މީގެ ކުރިން އެމްޕީއެލްއިން ވަނީ ހއ. އުލިގަމުގައި އައިއެސްޕީއެސް ގޭޓެއް ގާއިމުކޮށް، ހއ. ތުރާކުނުގައި ވޯޓަރ ބަންކަރިންގ ޚިދުމަތަށް ބޭނުންވާ ފެން ބާޖެއް ބޭއްވުމަށް އެއްބަސްވުމެއްގައި ސޮއިކޮށްފައެވެ. މި މަޝްރޫޢުތަކުގެ ސަބަބުން އުތުރުގެ ރަށްތަކުގެ އިގްތިސާދަށް ބޮޑު ކުރިއެރުމެއް ލިބޭނެ ކަމަށް ބެލެވެއެވެ.

އެމްޕީއެލް